Karantın: Mereke kúnderi astanalyq kafe-barlar túni boıy jumys istegen

NUR-SULTAN. QazAqparat - Nur-Sultan qalasynda mobıldi top mereke kúnderi kafe-bar, meıramhanalarda reıd júrgizdi, dep habarlaıdy QazAqparat.

2 qańtar túnde elorda polıtseıleri birneshe nysandy aralady. Mysaly túngi 02:32 kezinde «CABERA» meıramhanasy jumys istep turǵan. Bul mekeme bas memlekettik sanıtardyń qaýlysynda kórsetilgen talaptardy saqtamaǵan, sol úshin jaýapkershilikke tartyldy.

Sondaı-aq osy túni saǵat 00:57 shamasynda «QUARTET» karaoke klýbynda qonaqtar kóńil kóterip otyrǵany anyqtaldy. Karaoke klýbqa jınalǵan halyqtyń sany 30-dan asyp ketken, onyń ústine tún jarymynda áleýmettik araqashyqtyqty saqtamaı qyzmet kórsetken.

Búkil materıal qalalyq sanıtarlyq-epıdemıologııalyq baqylaý departamentine joldandy.

Nur-Sultan polıtseıleri 2 qańtar túnde taǵy «TEQUILA» jáne «PeiZdes» resto-baryna bas suǵyp, tekserý júrgizdi. Alǵashqysynda túnniń bir ýaǵynda 70 adam saýyq-saıran quryp otyrsa, ekinshisinde 30-dan astam qonaq bolǵan.

Eki mekemedegi karantın buzý faktileri boıynsha qalalyq sanıtarlyq-epıdemıologııalyq baqylaý departamenti shara qoldanady.