Karantın: Qyzylordada sońǵy aptada 8 toı toqtatyldy

QYZYLORDA. QazAqparat - Qyzylordada sońǵy aptada karantın talabyn saqtamaǵan otbasylyq 8 toı toqtatyldy, dep habarlaıdy QazAqparat tilshisi.

Qazirgi tańda Qyzylorda oblysy jasyl aımaqta tur. Óńirde karantın talaptary jeńildetilgen. Degenmen Qyzylorda oblysy bas memlekettik sanıtarııalyq-dárigeriniń qaýlysy negizinde óńirde birqatar shekteý sharalary jalǵasýda. Osy talaptardyń saqtalýyn qadaǵalaý maqsatynda qala jáne aýdan ákimdikteriniń janynan qurylǵan monıtorıngtik top turaqty jumys júrgizýde.

«Nátıjesinde oblys ortalyǵynda 22-28 naýryz aralyǵynda 8 otbasylyq toı toqtatylǵan. Onyń ishinde, 7-ýi meıramhanada ótkizilse, 1-ýi jeke úıde bolǵany anyqtalǵan. Budan bólek, monıtorıngtik toptyń baqylaýy barysynda 27 naýryz kúni «Alen» kafesinde karantın talaptarynyń buzylǵany anyqtaldy. Bul baǵyttaǵy jumystar turaqty túrde jalǵasyn tabady», - dep málim etti Qyzylorda qalasy ákimdiginen.

Esterińizge sala ketelik, jyl basynan beri Qyzylorda oblysynda 100-den astam karantın talabyn buzý deregi tirkelgen.