Karantın: Qostanaı oblysynda tórt dámhana tún ortasynda jumys istegen

QOSTANAI.QazAqparat – Ótken demalys kúnderi Qostanaı oblysynda 40 ret karantın tártibi buzylǵan. Bul týraly oblystyń Taýarlar men qyzmetterdiń sapasy men qaýipsizdigin baqylaý departamentiniń baspasóz qyzmeti aqparat taratty, dep habarlaıdy QazAqparat.

Qostanaı oblysynda karantın tártibin saqtaý boıynsha reıdter jalǵasýda. Tekserý kezinde Qostanaı qalasynda túngi 23:00-den keıin 2 dámhananyń jumys istegeni anyqtaldy. Mundaı ereje buzýshylyq Meńdiqara aýdany men Rýdnyı qalasynda da tirkelgen.

«Quramyna jergilikti polıtsııa qyzmetiniń, sapany baqylaý komıtetiniń, qalalyq jáne aýdandyq ákimdikterdiń qyzmetkerleri kiretin monıtorıngtik toptardyń birlesken reıdteri barysynda demalys kúnderi oblys boıynsha 363 qoǵamdyq tamaqtaný jáne oıyn-saýyq obektisi tekserildi. Jalǵa alynǵan kottedjde otbasylyq is-sharany ótkizý faktisi anyqtaldy. Barlyǵy karantındik jáne epıdemııaǵa qarsy talaptardyń 40 buzylýy tirkeldi. Rýdnyı, Qostanaı jáne Sarykól aýdandarynda satýshylar men aspazshylar arnaıy qolǵapsyz jumys istegen. Joǵaryda kórsetilgen barlyq erejebuzýshylyqtar boıynsha materıaldar protsestik sheshim qabyldaý úshin qaralýda», delingen vedomstvo habarlamasynda.

Reıd sharalary osy aptada da jalǵasady.