Karantın: Qoǵam belsendileri turǵyndardy jaýapty bolýǵa shaqyrdy
NUR-SULTAN. QazAqparat - Bıyl toıdyń sanyn qysqartyp, qoǵam bolyp tártipke boı usyný kerek. Saıasattanýshy Samat Nurtaza karantın shekteýlerin birtindep alýǵa qatysty osyndaı pikir bildirdi, dep habarlaıdy QazAqparat.
«Toı-tomalaq, jıyn koronavırýstyń keń taralyp ketkenine sebepshi boldy dep oılaımyn. Bıyl toıdyń sanyn sál qysqartyp, qoǵam bolyp tártipke boı usynsaq áldeqaıda durys bolar edi», - deıdi saıasattanýshy Samat Nurtaza.
Onyń aıtýynsha, qoǵam tártipti bolsa, erejege baǵynsa - dertten tezirek qutylady.
«Maýsymdyq tumaýǵa baılanysty kúzde vırýstyń ekinshi tolqyny júredi degen qaýip bar. Sondyqtan áleýmettik araqashyqtyqty saqtap, maska taǵyp júrý asa mańyzdy. Tumaý men pnevmokokqa qarsy vaktsına saldyrǵan da jón», - deıdi «Talap» qoldanbaly zertteý ortalyǵynyń dırektory Rahym Oshaqbaev.
Eske sala ketsek, 17 tamyzdan bastap birqatar nysan jumysyn qaıta bastaıdy.
