Karantın kezindegi jumystardy úılestire almaǵan Ekibastuz ákimi sógis aldy
NUR-SULTAN. QazAqparat - Pavlodar oblysynyń aýmaǵyndaǵy Ekibastuz qalasynda karantın sharalary kúsheıtildi. Qalaǵa oblystyq densaýlyq saqtaý basqarmasy basshysynyń orynbasary, oblystyq jergilikti polıtsııa qyzmetiniń basshysy jáne basqa qosymsha qyzmetkerler jumys babymen jiberildi, dep habarlaıdy QazAqparat tilshisi.
«25 sáýir kúni Pavlodar oblysynyń ákimi Ábilqaıyr Sqaqov Ekibastuz qalasynyń TJ boıynsha shtabynyń otyrysyna qatysty. Aımaq basshysy karantın jaǵdaıynda qalalyq mekemelerdiń ózara áreketinde tıimdiliktiń joǵyn, sonyń nátıjesinde karantın rejımi men oqshaýlaý jumystary tıisti túrde qamtamasyz etilmegenin atap ótti»,- delingen oblys ákimdiginiń baspasóz qyzmeti taratqan aqparatta.
25 sáýir kúngi saǵat 18:30-daǵy derekke sáıkes, Pavlodar oblysynda koronavırýs ınfektsııasynyń 89 jaǵdaıy tirkeldi. Onyń 65 paıyzy Ekibastuz qalasynda oryn alǵan.
«COVID-19 rastalǵan naýqastardyń týystary men baılanysta bolǵan adamdaryn anyqtaý algorıtminiń oryndalýy boıynsha máseleler bar. Bul jumystar keıde berilgen merziminen kesh jasalǵan. Budan bólek, maǵan karantınge jabylǵan kireberisterdiń turǵyndary óz-ózin oqshaýlaý erejelerin ustamaǵany jóninde habarlama kelip túsýde. Bul degenimiz qalalyq ákimdik, TJ boıynsha qalalyq operatıvtik shtab jaǵdaıdy turaqtandyrý úshin der kezinde shara qabyldamaǵanyn bildiredi», – dedi Ábilqaıyr Sqaqov.
Qalalyq shtab algorıtmdi ustaný jáne vedomstvoaralyq ózara árekettesýinde máseleler bolǵanyn moıyndady. Qazirgi ýaqytta, oblystyq epıdemıologtar men basqa mamandardyń aralasýynan keıin, jaǵdaı turaqtandyryldy jáne baqylaýǵa alyndy.
«Ekibastuz qalasy ákimine – qalalyq shtab basshylyǵyna shtabtyń tıisti túrde jumys atqarmaǵany úshin jáne bólimsheler arasynda jumys tıisti úılestirilmegeni úshin sógis jarııalandy. Oǵan qosa reglamentke sáıkes áreket etpegen emhanalardyń bas dárigerleriniń jáne Ekibastuzdyń bas sanıtarlyq dárigeriniń jaýapkershilikterin qarastyrý kerek. Quqyq qorǵaý organdaryna baqylaýdy kúsheıtý qajet, sonyń ishinde, karantındik obektilerde jáne qaladaǵy tártip saqtalýyn qamtamasyz etý mindet», - dedi oblys basshysy.
TJ boıynsha qalalyq shtabtyń otyrysy qorytyndysy boıynsha oblys ákimi jýyq arada Ekibastuz qalasynda koronavırýsty testileýge arnalǵan zerthananyń ashylýyn qarastyrýdy tapsyrdy. Qalada bul úshin kerekti ǵımarat pen mamandar bar.
