Karantın kezinde jumys istegen býkmekerlik keńse anyqtaldy
TÚRKІSTAN. QazAqparat – Saryaǵash aýdanynyń polıtseıleri reıd barysynda Jetisaı-Shymkent tasjoly boıynda túngi ýaqytta býkmekerlik keńseniń jumys istep turǵanyn anyqtady. Tekserý barysynda oıynhana ishinde 4-5 adam bolǵan, dep habarlaıdy oblystyq PD baspasóz qyzmeti.
Atalǵan jaıt QR QK-niń 307-baby «Zańsyz oıyn bıznesin uıymdastyrý» boıynsha tirkeldi.
Sondaı-aq, zańǵa qaıshy keletin zattar bolýy múmkin ekeni eskerilip, oıynhanadan 6 dana protsessor, 2 dana oıyn apparaty men chek-fıksatory aıǵaq zat retinde tárkilep alyndy. Saraptama taǵaıyndaldy. Qazirgi tańda osy is boıynsha sotqa deıingi tergeý amaldary júrgizilýde. Polıtseıler oıynhanaǵa qatysty mán-jaıdy tolyq tekserýde.
Sonymen qatar, saryaǵashtyq polıtseıler oıynhana ıesine QR ÁQBtK-niń 425-babymen «Halyqtyń sanıtarlyq-epıdemıologııalyq salaýattylyǵy salasyndaǵy zańnama talaptarynyń, sondaı-aq gıgıenalyq normatıvterdiń buzylýy» boıynsha hattama toltyrdy.
Óz kezeginde Túrkistan oblysy polıtseıleri turǵyndarǵa jáne kásipkerlerge karantın talaptaryn ıaǵnı betperdelik rejım men araqashyqtyqty saqtaýdy, ásirese zańsyz oıynhanalar ashyp, jastardyń sanasyn ýlaýǵa jol bermeýdi eskertedi.
