Karantın kezinde Jetisaıdan Almatyǵa jolaýshy tasymaldaǵan avtobýs ustaldy
Oblystyq PD baspasóz qyzmetiniń málimetinshe, mobıldik toptarmen karantındik talaptardy saqtamaý men gıgıenalyq normatıvterdiń buzylýy boıynsha 148 jáıt anyqtalǵan. Onyń ishinde 4 jaıt úılený toıy men otbasylyq jıyndardy uıymdastyrý boıynsha tirkelip otyr. Sondaı-aq, reıdtik is-sharalar barysynda Túrkistan oblysy polıtseıleri dári-dármekti joǵary baǵamen zańsyz satýdyń 33 faktisin áshkere etti.
Máselen, Jetisaı aýdanynda aýdandyq polıtsııa bóliminiń JPQ patrýldik polıtsııa qyzmetkerleri Almaty qalasyna bara jatqan 12 jolaýshysy bar avtobýsty toqtatqan. Avtobýstarmen qalaaralyq jolaýshytasymalǵa tıym salynǵanyna qaramastan qoǵamdyq kólik ıeleri jolǵa shyqqany anyqtaldy.
Nátıjesinde júrgizýshi men jolaýshylar avtobýsy Jetisaı APB-na jetkizilip, avtobýs aıypturaqqa qoıyldy. Tártip buzýshyǵa qatysty QR ÁQBtK-niń 425 baby «Halyqtyń sanıtarlyq-epıdemıologııalyq salaýattylyǵy salasyndaǵy zańnama talaptaryn, sondaı-aq gıgıenalyq normatıvterdi buzý» boıynsha ákimshilik hattama toltyrylyp, jınaqtalǵan aqparattar sheshim qabyldaý úshin tıisti organǵa jiberildi.
Al, Qazyǵurt aýdanynda jergilikti turǵynnan dárihanalardyń birinde dári-dármekter qymbat baǵamen satylyp jatqany jóninde habarlama túsken. Bul jáıtti teksergen polıtseıler dárihananyń satýshysynyń tutynýshyǵa «Anaferon» dárisin jáne «atsetılsalıtsıl qyshqylynyń» qaptamasyn jalpy somasy 1600 teńgege satqanyn anyqtaǵan.
Atalǵan jaıt boıynsha jınaqtalǵan is-qujattary tıisti sheshim qabyldaý úshin QR Densaýlyq saqtaý mınıstrliginiń Túrkistan oblysy boıynsha taýarlar men qyzmetterdiń sapasy men qaýipsizdigin baqylaý komıtetine joldanǵan.
Sol kúni Saryaǵash aýdandyq PB-niń polıtsııa qyzmetkerleri 5 «Kotenoks» býmasyn 10 000 teńgege satyp, paıda tappaq bolǵan áıeldi ustaǵan.
Tártip saqshylary atalǵan dári-dármekterdi tárkilep alyp, qazirgi ýaqytta atalǵan jaıt boıynsha tekserý jumystary júrgizilýde.