Karantın kezinde veterınarlyq klınıkalar qalaı jumys istep jatyr
ALMATY. QazAqparat – Megopolıste karantınge baılanysty úı janýarlaryn emdeıtin klınıkalardyń jumys ýaqyty qysqaryp, sanıtarlyq talap kúsheıtildi. Bul týraly osy sala mamandary aıtty, dep habarlaıdy QazAqparat tilshisi.
«Dog Premium» veterınarlyq klınıkanyń bas dárigeri Aleksandr Krıvonojkıniń aıtýynsha, úı janýarlaryn emdeıtin klınıka búgingi tańda shtattyq rejımde jumys istep tur. Desekte, tótenshe jaǵdaıǵa baılanysty biraz ózgerister engizilgen.
«Biz stattsıonar bóliminde qyzmet kórsetetin mamandar sanyn qysqartyq. Sebebi, úı janaýarlaryn almaýǵa tyrysamyz. Tek jaǵdaıy aýyr jáne ınfektsııalyq aýrýǵa shaldyqqandardy qabyldaımyz. Baqylaýda ustaý úshin. Hırýrgııa bólimi men dári-dármek satatyn dárihana keshki saǵat altyǵa deıin jumys isteıdi. Karantınge deıin táýlik boıy qyzmet kórsetetin»,- deıdi «Dog Premium» veterınarlyq klınıkasynyń bas dárigeri Aleksandr Krıvonojkın.
Sondaı-aq, ol karantınge qaramastan vetdárigerdiń kómegine júginetinderdiń sanynyń azaımaǵanyn atap ótti.
«Bizge ádettegideı teri men maýsymdyq juqpaly aýrýǵa shaldyqqandardy jıi ákeledi. Odan bólek, kún jylyǵaly ıt, mysyqtardy kene sııaqty jándikter shaǵyp alyp jatyr. Sonymen qatar, olar úı jaǵdaıynda túrli jaraqat alady. Kóliktiń astyna túsip ketkender de bar. Endi aýrýlardyń túri kóp. Barynsha emdep, jaraqatyn tańyp beremiz»,– deıdi Aleksandr Krıvonojkın.
Vetdárigerdiń aıtýynsha, qajet bolǵan jaǵdaıda mamandar janýarlarǵa úı jaǵdaıynda kómek kórsetip, emdeıdi.
«Qazir qalada karantın, ıaǵnı adamdar tek ruqsat qaǵazben ǵana júre alady. Sondyqtan biz shaqyrtýlardy qabyldaımyz. Arnaıy kóligimiz de, ruqsatymyz da bar. Negizi biz mundaı qyzmet túrin burynan kórsetemiz»,– dedi ol.
Budan bólek, mamandar telefon arqyly da keńes beredi.
«Qala turǵyndary bizge beıneqońyraý soǵyp, úı janýarlarynyń jaǵdaıyn aıtyp, kórsetedi. Bul aýrýdy dál jáne jyldam anyqtaý úshin óte mańyzdy. Eger mysyqqa, ıtke nemese basqa úı janýarlaryna ýaqytynda dıagnoz qoıylmasa onyń densaýlyǵyna zııan kelýi múmkin. Sondyqtan vetdárigerler vıdeo nemese foto arqyly úı janýarynyń jaǵdaıyn qarap, qajet bolsa, statsıonarǵa jatqyzýǵa keńes beredi»,– dep qortyndylady Aleksandr Krıvonojkın.
Megopolıstegi veterınalyq klınalar sanıtarlyq talaptardy qatań saqtaýǵa tyrysady.
«Álemdi jaýlaǵan myna indettiń emi áli tabylǵan joq. Sondyqtan odan saqtanýdyń birneshe joly ǵana bar. Ol oqshaýlaný jáne tazalyq. Biz úı janýarlarymen jumys isteıtin bolǵandyqtan sanıtarlyq talapty qatań ustanamyz. Klınıka mamandary jumysqa kelgende eń aldymen dene temperatýrasyn ólsheıdi, jeke qorǵanys quraldarymen tolyq qamtamasyz etilgen (maska, qolǵap, kózildirik, antıseptık). Sonymen qatar, bizge jetkizilgen úı janýarlarynan eń aldymen analız alamyz. Ózimizdiń zerthanada taldaý jasalady. Tek sodan keıin ǵana baryp emdeýdi bastaımyz»,– dedi «Talısman» veterınarlyq klınıkasynyń dırektory Maksım Kraskovıch.
