Karantın kezinde otbasylyq janjalǵa jol bermes úshin ne isteý kerek – psıhoanalıtık keńesi
NUR-SULTAN. QazAqparat – Karantınge baılanysty ár otbasynyń úıde oqshaýlanýyna baılanysty adamdardyń boıynda ashý-yza jınalyp, bul óz kezeginde otbasynyń qalypty ómirine keri áserin tıgizýi múmkin. Kazinform Instagram paraqshasynda tikeleı efırge shyqqan Qazaqstandaǵy tanymal psıholog, Psıhoanalız ınstıtýtynyń dırektory Anna Qudııarova osyndaı qaýiptiń baryn aıtyp ótti, dep habarlaıdy QazAqparat tilshisi.
«Qazir adamdardy ashý-yza býyp tur. Bul jaǵdaı otbasyndaǵy janjaldy, urys-keristi týyndatady. Aqyry úıdegilerdiń biriniń (kóbine er adamdar) ishkilikke berilýi de kóbeıýde. Munyń sońy otbasylyq zorlyq-zombylyqqa aparady», - deıdi Anna Qudııarova.
Psıhoanalıtık eldegi ártúrli jaǵdaı, onyń ishinde ekonomıkalyq sıpattaǵy ahýal da osyndaı urys-keristi týyndatatynyn aıtady.
«Emotsııalyq nemese ekonomıkalyq turǵyda qazir jaǵdaı máz emes. Áıtse de, dál osy kezeńde adamdar bir-birine túsinistikpen qarap, sabyrly bolýy kerek. Álbette, shekteýli keńistikte qamalyp qalý ońaı emes. Mundaı kúrdeli kezeńde erli-zaıyptylardyń ajyrasý faktileri artyp kete me dep qorqamyz. Aınalyp kelgende jaýapkershilik óz moınymyzda ekenin uǵynýymyz kerek. Kez kelgen qadamǵa barmas buryn balalaryńyz ben otbasyńyzdyń jaıyn oılaǵanyńyz jón», - dedi ol.
Psıholog mundaı jaǵdaıda urys-keristi aınalyp ótý ońaı bolmasa da, shekaradan shyǵyp ketpeý kerektigin eskertedi.
