Karantın kezinde múgedektikti aıqyndaý qalaı júzege aspaq
«QR Eńbek jáne halyqty áleýmettik qorǵaý mınıstriniń 2020 jylǵy 25 naýryzdaǵy № 109 buıryǵymen Tótenshe jaǵdaı kezeńinde múgedektigi boıynsha memlekettik áleýmettik járdemaqyny jáne eńbek etý qabiletinen aıyrylý jaǵdaıynda áleýmettik tólemdi júzege asyrý tártibiniń erekshelikteri belgilendi. Tótenshe jaǵdaı kezeńinde memlekettik qyzmetterdi kórsetý «Elektrondyq úkimet» veb-portalyndaǵy «Elektrondyq ótinish» servısi arqyly elektrondyq ótinish negizinde júzege asyrylyp jatyr. Sondyqtan da medıtsınalyq-áleýmettik saraptama bólimine barýdyń qajeti joq, memlekettik qyzmet syrttaı júrgiziledi», - dedi Aıdynjan Narmatov.
Sonymen qatar, ol tótenshe jaǵdaı kezeńinde múgedektikti nemese eńbek etý qabiletinen aıyrylý dárejesin belgileý nemese qajetti áleýmettik qorǵaý sharalaryn aıqyndaýda memlekettik qyzmetti kórsetý tártibiniń erekshelikterin atady.
«Múgedektikti nemese eńbek etý qabiletinen aıyrylý dárejesin nemese qajetti áleýmettik qorǵaý sharalaryn belgileý medıtsınalyq-áleýmettik saraptama júrgizý qaǵıdalaryna sáıkes kýálandyrylatyn adamdy múgedektik belgilengen kúnnen bastap alty aı ishinde baqylap, tekserip, bir jyldan aspaıtyn merzimge syrttaı júrgizedi. Qaıta kýálandyrý merzimi tótenshe jaǵdaı engizilgenge deıin bir aıdyń ishinde jáne tótenshe jaǵdaı ýaqytynda kelgen adamdarǵa múgedektiktiń, jalpy eńbek etý qabiletinen aıyrylý, kásiptik eńbek etý qabiletinen aıyrylý dárejesiniń jáne múgedekti ońaltýdyń jeke baǵdarlamasynyń merzimderi tótenshe jaǵdaı oryn alǵan kezeńde avtomatty túrde uzartylady.
Múgedektigi boıynsha memlekettik áleýmettik járdemaqy jáne (nemese) eńbek etý qabiletinen aıyrylý jaǵdaıyna áleýmettik tólem alýshylar bolyp tabylatyn adamdarǵa tótenshe jaǵdaı kezeńinde tólemder budan buryn belgilengen múgedektik tobyna jáne (nemese) jalpy eńbek etý qabiletinen aıyrylý dárejesine sáıkes tótenshe jaǵdaı rejimi aıaqtalǵan aıdy qosa alǵanǵa deıin tólenedi», - dedi Eńbek, áleýmettik qorǵaý jáne kóshi-qon komıteti departamentiniń basshysy.
Munyń aldynda spıker Almatyda 589 myńnan asatyn adamnyń zeınetaqy men járdemaqysyna ústemeaqy qosylatynyn aıtqan bolatyn.