Karantın kezinde eriktiler lıgasy qandaı kómek kórsetti

ALMATY. QazAqparat – «Qazaqstan Eriktiler lıgasy» QQ Almaty fılıalynyń tóraıymy Baǵdat Anarbaeva onlaın brıfıng barysynda eriktiler tarapynan kórsetilgen kómek týraly aıtty, dep habarlaıdy QazAqparat tilshisi.

Onyń aıtýynsha, 16 naýryzdan bastap qalada turatyn 5 myńǵa jýyq muqtaj otbasyǵa azyq-túlik sebeti jasaqtalǵan. Úıinen shyǵýǵa múmkindigi joq azamattarǵa dári-dármek jetkizildi. 200 nysanda qoǵamdyq monıtorıng jasaldy. Olardyń kópshiligi karantın shekteýleri týraly talapty buzǵan. Quqyq qorǵaý organdary atalǵan nysandarǵa qatysty shara qoldandy.

«15 vırýs oshaǵyna turaqty túrde eriktiler azyq-túlik pen dári-dármek jiberip turdy. 40 jýyq túsindirý jumysy júrgizilgen. 10 myńdaı telefon qońyraýyna jaýap berilgen», - dedi Baǵdat Anarbaeva.

Sonymen qatar, koronavırýs pandemııasyna baılanysty Elbasy, «Nur Otan» partııasynyń Tóraǵasy N.Á. Nazarbaevtyń bastamasymen halyqtyń áleýmettik turǵydan osal toptaryn qoldaý boıynsha birqatar keshendi sharalar uıymdastyrylǵan bolatyn. Osy sharalardy atqarý úshin «Volonterlyq korpýs» jobasynyń aıasynda Almatyda jasotandyqtar men belsendi partııa ókilderinen quralǵan 200 adamnan turatyn volonter shtaby óz jumysyn bastady. Barlyq volonterler azyq túlik pen gıgıenalyq zattardy baılanyssyz jetkizdi, sondaı-aq olarǵa qorǵanysh kıimderi berildi.

«Volonterlik korpýs aıasynda kommýnaldy qyzmet jumyskerlerine 300 kóp rettik maska taratyldy. Posttarda qyzmet etken medıtsına mamandary men qyzmetkerlerge «Jas Otan» qalalyq keńesiniń múshesi Vahıd Gasanov 3 mln teńgeniń kómegin kórsetilgen. Adam kóp shoǵyrlanatyn jerlerde «Jaqynyńa janashyr bol» aktsııasy aıasynda 5 myń maska taratyldy. «Jas Otan» eriktileri gospıtalge qural-jabdyq ákelgen 6 aýyr kóliktegi júkterdi túsirýge kómektesken. Koronavırýspen kúreske atsalysyp jatqan «Dárigerlerge taǵzym» aktsııasy aıasynda 800 paket azyq-túlik taratyldy», - dedi Almaty qalasy Jas Otan jastar qanatynyń jetekshisi Madı Ahmetov.