Karantın kezinde Aqtóbede qalyp qoıǵan Moldova azamattary eline oraldy
AQTÓBE. QazAqparat – Karantın kezinde Aqtóbede qalyp qoıǵan Moldovanyń tórt azamaty Otanyna oraldy. Polıtsııa olardyń qujattaryn qaıta rásimdeýge kómektesti, dep habarlaıdy QazAqparat tilshisi.
Іndet órshigen kezde Moldovanyń tórt azamaty Aqtóbede qalyp qoıyp, óz Otanyna bara almady. Ekeýinde tólqujatynyń jaramdylyq merzimi ótip ketken. Qazaqstan men Moldova bir-birimen shektespegendikten, Reseı shekarasynan ótý qıynǵa soqty.
«Biz adamdarǵa quqyqtyq keńes berip, qujattandyrý jumystaryna kómektesemiz. Qıyn jaǵdaıǵa tap bolǵandardy nazardan tys qaldyrmaımyz. Kóshi-qon qyzmetteri ortalyǵynda mıgranttarǵa, sheteldik azamattarǵa turaqty túrde keńes berip, polıtsııa qyzmetkerlerimen ózara is-qımyl jáne problemalyq máselelerdi talqylaımyz. Іndet kezinde mıgranttarǵa ońaı emes. Kómektesip, bar jaǵdaıy jasaldy»,- dedi Aqtóbe qalasyndaǵy «Dáris» aqparattyq-konsýltatıvtik ortalyǵynyń dırektory Gúlnura Idıgeeva.
Moldova azamattary úshin sertıfıkat rásimdeldi. Nur-Sultan qalasyna bılet satyp alyndy. Jol shyǵynyn Moldova halyqaralyq kóshi-qon uıymy tóleıtin boldy. Tipti PTR test tapsyrýǵa múmkindik berildi.
Polıtsııa departamentiniń málimetinshe, 2020 jyldyń 10 aıynda Aqtóbe oblysynda quqyqtyq mártebesi rettelmegen 111 adam anyqtalyp, qujat berildi.
«Adamdar túrli jaǵdaıdy bastan ótkeredi. Jeke basyn kýálandyratyn qujattyń bolmaýy járdemaqy men zeınetaqy resimdeý, kepildik berilgen memlekettik jáne medıtsınalyq qyzmetterdi alý quqyǵynan aıyrady. Resmı jumysqa ornalasý quqyǵynan aıyrylady. Kóbinese qujattardy qalpyna keltirý joldaryn jáne olarǵa kim kómektese alatyndyǵyn bilmeıdi. Ol úshin aldymen kóshi-qon basqarmasynyń júgingen jón», - deıdi oblystyq kóshi-qon qyzmeti basqarmasynyń erekshe tapsyrmalar jónindegi aǵa ınspektory polıtsııa maıory Sapar Amantaev.
