Karantın: Qazaqstanǵa shetelden ushyp kelgenderge qatysty shekteýler qalaı ózgerdi
Qazaqstanǵa ushyp kelgen sheteldikter qazirgi ýaqytta eki aptalyq karantınge jatqyzyla ma? Іndet órshigen ýaqytta áýe qatynasy boıynsha memleketterdi qaýpi bar toptarǵa bólý tártibi kúshinde me? «QazAqparat» HAA Indýstrııa jáne ınfraqurylymdyq damý mınıstrligine osyndaı resmı saýal joldaǵan edi.
«QR Bas memlekettik sanıtarııalyq dárigeriniń 2020 jylǵy 15 tamyzdaǵy № 48qaýlysyna sáıkes, halyqaralyq turaqty áýe reısteri boıynsha memleketter úshin birqatar shekteý sharasy kúshinde qalǵan. Atap aıtqanda І sanatqa engizilgen Qytaı, Ońtústik Koreıa, Japonııa, Grýzııa, Taıland, Vengrııa, Úndistan, Germanııa, Chehııa, Malaızııa, BAÁ, Belarýs, Túrkııa, Mysyr, Ýkraına, Nıderlandy, Reseı elderinen kelgender termometrııa men saýalnamadan ótedi», - delingen jaýapta.
Al ІІ sanatqa jatatyn Polsha, Ózbekstan, Tájikstan jáne úshinshi sanattaǵy memlekettermen turaqty emes (evakýatsııalyq jáne charterlik) reıster jasaıtyn elder – termometrııa men saýalnamadan ótedi. Sondaı-aq osy memleketterdiń azamattary eger QR-nyń memlekettik shekarasyn kesip ótken kúnnen bastap 5 kúnnen keshiktirmeı PTR tásilimen zerthanalyq zertteýdiń teris nátıjesi bar COVID-19 saraptamasynyń anyqtamasy bolsa (budan ári – anyqtama) – Qazaqstanǵa shekteýsiz kire alady. Anyqtama bolmaǵan jaǵdaıda ushyp kelgen kúnnen bastap 48 saǵat ishinde PTR tásilimen COVID-19 boıynsha zerthanalyq tekserýden mindetti túrde ótýi týraly habarlama berýi nemese 14 kúnge úı karantıni jatqyzylýy kerek.
І jáne ІІ sanattaǵy elderden basqa barlyq elder boıynsha turaqty reısterge tyıym salynǵan.
«QR Bas memlekettik sanıtarııalyq dárigeri atalǵan elderdegi jaǵdaıdy qadaǵalap, epıdemıologııalyq jaǵdaı nasharlaǵan kezde tıisti sharalar qabyldaıdy», - delingen jaýapta.
