Karantın: Qazaqstandaǵy kınoteatrlar 20 mlrd teńge shyǵynǵa batqan

NUR-SULTAN. QazAqparat – Qazaqstanda kınoteatrlar nege ashylmaı jatyr? Bul suraqqa OKQ-da ótken baspasóz máslıhatynda Mádenıet jáne sport mınıstri Aqtoty Raıymqulova jaýap berdi, dep habarlaıdy QazAqparat tilshisi.

«Elimizdiń bas memlekettik sanıtarlyq dárigeri men Densaýlyq saqtaý mınıstrligi qazirgi epıdemıologııalyq jaǵdaıǵa baılanysty kınoteatrlardy ashýǵa áli de erte dep sanaıdy. Biz epıdemıologııalyq jaǵdaı jaqsaryp, kınoteatrlardyń ashylýynan úmittenip otyrmyz. Kınoteatrlardyń óte úlken shyǵyndarǵa ushyrap, jumys oryndarynyń qysqaryp jatqanynan habarymyz bar. Biraq álemdegi jaǵdaı osyndaı. Kınoteatrlardy ashqan basqa elder kóp ótpeı qaıta jabýǵa májbúr boldy», - dedi Aqtoty Raıymqulova.

Mınıstr kınoteatrlardyń qarjylyq shyǵynyn jabý úshin beriletin jeńildikter týraly aıtyp ótti.

«Kórermen qazir saq. Pandemııaǵa deıingideı kınoteatrǵa kóp kelmeýi múmkin. Sondyqtan biz búgin kınoteatrlardyń jaǵdaıyn túsinemiz. Ulttyq ekonomıka mınıstrligimen birge kınoteatrlarǵa beriletin artyqshylyqtar men salyqtyq jeńildikter týraly normalardy ázirledik. Bul olardy jyl sońyna deıin jeke tabys salyǵynan, áleýmettik salyqtan, sondaı-aq mindetti zeınetaqy tólemderinen jáne áleýmettik medıtsınalyq saqtandyrý tólemderinen bosatady. Olar sondaı-aq ShOB-ti tekserýden bosatylady, ıaǵnı memleket olardyń shyǵynyn barynsha azaıtý úshin shara qoldanady. Biraq, ókinishke qaraı, sanıtarlyq dárigerdiń sheshimi ázirge kınoteatr ashýǵa múmkindik bermeıdi», - dedi mınıstr.

Aqtoty Raıymqulova keltirgen málimetke sáıkes, pandemııa saldarynan kınoteatrlar 20 mlrd teńge shyǵynǵa batqan.