Karantın: Qaraǵandy oblysynda jyl basynan beri 3 myńǵa jýyq zańbuzýshylyq anyqtaldy

QARAǴANDY. QazAqparat – Qaraǵandy oblysynda qazirgi tańda 122 monıtorıngtik top jumys isteıdi. Oblystaǵy obektilerdiń jalpy sany 13670 quraıdy. Olardy tekserý úshin memlekettik qyzmetkerler, polıtsııa, qoǵam belsendileri, volonterler qatarynan 600-ge jýyq adam jumyldyryldy, dep habarlaıdy QazAqparat tilshisi.

«Bıylǵy jyldyń 1 qańtarynan bastap monıtorıngtik toptar 176 168 nysandy tekserdi, 2771 zańbuzýshylyq anyqtaldy, 1673 aıyppul salyndy. Aıyppuldardyń somasy 132 mıllıon teńgeden asty. Jeke tulǵalar men zańdy tulǵalardyń sanıtarlyq talaptardy buzý faktileri anyqtalǵan jaǵdaıda, monıtorıngtik toptar úılestirý ortalyǵyna aqparat jiberedi, ol SES qyzmetkerleri úshin shuǵyl habarlama jazyp beredi», - dep habarlady JBO jetekshisi Rýstam Qojabekov.

Al jeke tulǵalar mobıldi toptardyń reıdteriniń, sondaı-aq ishki ister organdary bergen materıaldardyń nátıjeleri boıynsha ákimshilik jaýapqa tartylady.

Laýazymdy tulǵalardyń is-qımyl algorıtmine sáıkes, 19 qazannan bastap monıtorıngtik toptar kásiporyndar men uıymdardyń qyzmetkerlerin vaktsınalaý boıynsha reıd sharalaryn bastady. Birinshi kezekte tirshilikti qamtamasyz etý jáne bilim berý nysandary (kolledjder) qamtyldy.

«19 qazan men 22 qazan aralyǵynda oblystyń monıtorıngtik toptary 57 nysandy tekserdi, qyzmetkerlerdiń jalpy sany 13 929 adam, onyń ishinde 12 752 adam (91,6%) vaktsınalandy», - dep tolyqtyrdy Rýstam Qojabekov.

Sondaı-aq oblys boıynsha «109» senim qyzmeti jumys isteıdi. Atalǵan qyzmetke karantın rejımin buzý boıynsha oblys turǵyndarynan ótinishter kelip túsedi. Bul aqparat monıtorıngtik toptar tarapynan tekseriledi jáne rastalǵan jaǵdaıda sharalar qabyldaý úshin sanepıdbaqylaý organdaryna jiberiledi.