Karantın erte me, kesh pe aıaqtalady, ómir óz arnasyna túsedi - Saparbaev
TARAZ. QazAqparat – Jambyl oblysy ákimi Berdibek Saparbaevtyń tóraǵalyǵymen ótken apparattyq keńeste aımaqtyń aǵymdaǵy jyldyń birinshi toqsanyndaǵy áleýmettik-ekonomıkalyq damý qorytyndylary saralandy. Sondaı-aq, jergilikti atqarýshy organdardyń karantın jaǵdaıyndaǵy is-áreketteri jáne halyqpen keri baılanys ornatýǵa qatysty máseleler talqylandy, dep habarlaıdy QazAqparat oblys ákimdiginiń resmı saıtyna silteme jasap.
Ekonomıka jáne bıýdjettik josparlaý basqarmasynyń basshysy Gúldana Jaýynbekovanyń aıtýynsha, aǵymdaǵy jyldyń úsh aıynda oblys boıynsha 114,7 mıllıard teńgeniń ónimi óndirilip, ónerkásiptegi ónim kóleminiń ındeksi 97,9 paıyzdy quraǵan. Ekonomıkalyq kórsetkishterdiń tómendeýine «Qazfosfat» JShS zaýytyndaǵy peshtiń jáne Taraz ben Merki qant zaýyttary jumystarynyń toqtaýy áser etken.
Bıýdjet kirisindegi kórsetkishter de oıdaǵydaı emes. Memlekettik kirister departamenti basshysynyń habarlamasynda kórsetilgendeı, jergilikti bıýdjettiń shyǵyndary 3,195 mıllıard teńgeni quraıdy.
- Karantın erte me, kesh pe aıaqtalady. Ómir aǵymy óz arnasyna túsedi. Sondyqtan búgingi jaǵdaıdy tıimdi paıdalanyp, kórsetkishterdi qalpyna keltirýge tyrysý kerek. Eń aldymen, jergilikti jerlerdegi ahýaldyń naqty kórinisine muqııat taldaý jasap alý mańyzdy. Búgin ne isteý kerekpiz, erteń ne isteı alamyz? Shaǵyn kásip pen halyqty qoldaý jónindegi memlekettik baǵdarlamalardy iske asyrýǵa aıryqsha nazar aýdarý qajet. Bul maqsatqa Úkimet tarapynan aýqymdy qarajat qarastyrylýda. Ony utymdy uqsata bileıik. Bul oraıdaǵy jobalar óńir ekonomıkasyna jumys jasap, turǵyndardyń tabysyn arttyrýǵa yqpal etýi tıis, - dedi Berdibek Saparbaev.
Oblys ákimi óz orynbasarlary men basqarma basshylaryn «Evrohım» JShS, Amangeldi munaı óńdeý zaýyty sııaqty iri kásiporyndarmen júıeli jumys júrgizýge shaqyrdy.
Óńirdiń keıbir orta jáne shaǵyn kásiporyndarynyń toqtap turýyna qatysty ózekti máselelerdiń ońynan sheshilýine qol jetkizý qajet. Óz kezeginde kásiporyn basshylary jumysshylaryna qamqorlyq jasaýy tıis. Jalaqyny arttyrý máselesi de ózekti kúıinde qalyp otyr. Sondaı-aq, ınvestıtsııa tartý jónindegi jumystardy jandandyra túsý kerek.
Berdibek Saparbaev oblysta balalar jáne sport alańdaryn salý úshin «Samuryq-Qazyna» qorynan qarjy bólingenin atap ótti. Olardyń qurylysy Taraz qalasynyń Qarataý shaǵynaýdanynda, sondaı-aq Baızaq aýdanynyń Sarykemer jáne Qordaı aýdanynyń Masanshy aýyldarynda júrgizilmek. Bul oraıda jergilikti ákimdikter bólingen qarajatty tıimdi paıdalanǵany abzal.
Óńir basshysy jaýapty tulǵalarǵa karantındik tártiptiń talaptary men sharttaryn qatań saqtalýyn qamtamasyz etý qajettigin eskertti. Sonymen qatar, ol jaýapty tulǵalardyń nazaryn koronavırýstyq ınfektsııamen kúreste aldyńǵy sheptegi medıtsına qyzmetkerleri, polıtsııa jáne basqa da mamandar úshin tıisti jaǵdaılar jasaý kerektigine aýdardy.
