Karantın: Elordadaǵy «Alanııa» túngi klýby 20-ynshy ret aıyppul tóledi
NUR-SULTAN. QazAqparat - Buǵan deıin birneshe márte karantın rejımin buzǵan elordadaǵy «Alanııa» túngi klýby taǵy da quqyq qorǵaý organdarynyń nazaryna ilikti, dep habarlaıdy QazAqparat tilshisi.
«Búgin túngi saǵat 02.50-de mobıldi top «Alanııa« túngi klýbyn karantın rejımin taǵy buzǵanyn anyqtady. Bul joly kóńil kóterý ornynda 70 adam bolǵan. Osy ýaqytqa deıin, qyrkúıektiń sońynda 25 jastaǵy klýb ákimshisine birneshe ret eskertý jasalyp, tipti QR Ákimshilik quqyq buzýshylyq týraly kodekstiń 667-baby 1-tarmaǵymen ákimshilik jaýapkershilikke tartylǵan bolatyn. Alaıda, kóńil kóterý orny jumysyn jalǵastyra bergen. Osy fakti boıynsha túngi klýb ákimshisine qatysty ákimshilik is qozǵalyp, ol Nur-Sultan qalalyq mamandandyrylǵan aýdanaralyq sotynda qaraldy. Sot kýlb ákimshisin kináli dep taýyp, 1 táýlikke qamaýǵa alyndy. Alaıda, osyǵan qaramastan mobıldi top 13 qarashada túngi klýbtyń qaıtadan karantın rejımin buzǵanyn anyqtady. Sot klýb ákimshisin 2 táýlikke tutqynǵa alý týraly sheshim shyǵardy», - dep atap ótedi Nur-Sultan qalalyq polıtsııa departamentinen.
Vedomstvo málimetinshe, jyl basynan beri «Alanııa» túngi klýby túngi ýaqytta tynyshtyqty buzǵany úshin 20 ret ákimshilik jaýapqa tartylǵan.
Jalpy, ótken táýlikte mobıldi top 227 kásipkerlik sýbektisin tekserip, karantın rejımin buzýdyń 4 jaǵdaıyn anyqtady. Atalǵan faktilerge qatysty materıal jınalyp, sanıtarııalyq-baqylaý basqarmasyna ákimshilik jaýapkershilikke tartý úshin jiberildi.
«Nur-Sultan qalalyq Polıtsııa departamenti mekeme ıeleri men kelýshiler tarapynan oryn alyp otyrǵan nemquraılylyq ınfektsııanyń taralýyna alyp keletindigin eskertedi. Karantın rejımin buzýshylar qoldanystaǵy zańnamaǵa sáıkes jaýapkershilikke tartylady», - dep eskertedi vedomstvodan.
