Karantın: Elorda kafe-barynda tún jarymynda 300-ge jýyq adam saýyq qurǵan

NUR-SULTAN. QazAqparat - Karantın buzylǵanyn anyqtaý jáne olarǵa jol bermeý jónindegi monıtorıng toptary elordada kúsheıtilgen rejımde jumysyn jalǵastyryp jatyr, dep habarlaıdy QazAqparat qala ákimdiginiń resmı saıtyna silteme jasap.

14 naýryz túngi saǵat 02.00-de belgilengen jumys rejımin buzǵan elordalyq barlardyń birinde bir ýaqytta 300-ge jýyq adam saýyq qurdy.

Elordanyń sol jaǵalaýynda ornalasqan «Bla Bla Bar» karantındik shekteýlerge qaramastan, tún ortasynan keıin de jumys istedi.

Oqıǵa ornyna kelgen monıtorıng toby mekemede 300-ge jýyq adamnyń bolǵanyn anyqtady. Kelýshiler áleýmettik qashyqtyq pen maska rejımin saqtamady.

Materıal QR ÁQBtK 425-babyna sáıkes ákimshilik shara qabyldaý úshin Esil aýdanynyń sanıtarlyq-epıdemıologııalyq baqylaý basqarmasyna jiberildi.

Sondaı-aq, Esil aýdanynda jumys rejımin buzǵan «Zima» barynyń basshylyǵy da jaýapqa tartyldy.

Almaty aýdanynda ótken táýlikte monıtorıngtik top karantındik shekteýlerdi buzǵan 3 mekemeni - «Dostar» kompıýterlik klýbyn, «Menson» jáne «Janym sol» karaoke-klýbtaryn anyqtady.

Saryarqa aýdanynda «Tamshy» saýnasy elordanyń bas sanıtarlyq dárigeriniń shekteý sharalary týraly qaýlysyn buza otyryp, 00:00-den keıin jumysyn jalǵastyrdy.

Karantındi saqtamaǵany úshin «Qazyǵurt» kafesi de, Baıqońyr aýdanyndaǵy «Mezzo karaoke» zaly da jaýapkershilikke tartyldy.

Esterińizge sala keteıik, 10 naýryzdan bastap Nur-Sultan epıdemıologııalyq jaǵdaı boıynsha «qyzyl aımaqqa» endi.

Monıtorıng toptarynyń jumysy kúsheıtilgen.