Karantın elektr stansalaryn der ýaqytynda jóndeýge kedergi keltirdi – Nurlan Noǵaev

NUR-SULTAN. QazAqparat – Energetıkalyq kásiporyndardyń kúzgi-qysqy kezeńdegi jumysqa daıyndyǵy jalǵasýda. Bul týraly búgin Úkimet otyrysynda QR Energetıka mınıstri Nurlan Noǵaev aıtty, dep habarlaıdy QazAqparat tilshisi.

«Elimizdiń Birtutas elektr energetıkalyq júıesiniń turaqty jumysyn qamtamasyz etý, tutynýshylardy elektr jáne jylý energııasymen senimdi jabdyqtaý maqsatynda energetıkalyq kásiporyndardyń kúzgi-qysqy kezeńdegi jumysqa daıyndyǵy jalǵasýda. Júıelik operator bekitken kestege sáıkes elektr stansalaryndaǵy 5 energoblok, 31 qazan, 22 týrbına jóndeldi. Al 3 energoblok, 28 qazan men 22 týrbınany jóndeý jumystary áli de júrgizilýde. Atalǵan elektr stansalaryndaǵy jóndeý jumystary bıylǵy jylytý maýsymynyń ýaqtyly bastalýyna áser etpeıdi», - dedi ol.

Onyń atap ótýinshe, jóndeý jumystaryn keshiktirý, negizinen, tótenshe jaǵdaı men karantın kezeńinde shetelden qosalqy bólshekterdi jetkizý kidirisimen jáne jóndeý júrgizetin mamandardyń basqa elderden Qazaqstan Respýblıkasynyń aýmaǵyna kelýine qoıylǵan shekteýlermen baılanysty boldy.

«Elektr jelileri boıynsha jalpy uzyndyǵy 25 828 shaqyrym elektr berý jelilerin, sondaı-aq 439 birlik joǵary voltty kishi stansalardy jóndeý josparlanǵan. Búgingi tańda 25 152 shaqyrym elektr berý jelileri men 428 kishi stansa jóndeldi. Bul jyldyq jospardyń 97 paıyzyn quraıdy. Elektr jelilerin jóndeý bekitilgen kestelerge sáıkes aıaqtalýy josparlanýda. Jergilikti atqarýshy organdardyń aqparaty boıynsha 457 ortalyqtandyrylǵan jylýmen jabdyqtaý qazandyqtaryn jylytý maýsymyna daıyndyq úshin 1149 qazannyń 1132-si jóndeldi. Bul jyldyq jospardyń 98,5 paıyzyn quraıdy», - dedi Nurlan Noǵaev.