Karantın: Dáriger aýrýhananyń jumysyn vıdeomen kórsetti
NUR-SULTAN. QazAqparat - Nur-Sultan qalasynyń emdeý mekemelerinde qatań sanıtarlyq talaptar saqtalýda, dep habarlaıdy elorda ákimdiginiń resmı saıty.
Búgin №1 qalalyq kópbeıindi aýrýhanasynyń bas dárigeri Marat Abdýov provızorlyq statsıonarǵa vıdeoekskýrsııa jasap, atalǵan medıtsınalyq uıymda naýqastardy qalaı qabyldaıtynyn kórsetti.
«Búgin, 20 maýsymda, men shuǵyl qabyldaý bóliminde turmyn. № 2 post nemese koronavırýs ınfektsııasynyń belgileri bar naýqastar túsetin provızorlyq beket. Bul beket ınfektsııanyń taralýyna jol bermeýdiń aldyn alý úshin quryldy», - dedi M.Abdýov.
Bas dáriger ári qaraı tirkeý bólimine bardy. «Myna jerde tirkeý jáne naýqastardy medıtsınalyq suryptaý júrgiziledi, ıaǵnı onyń aýyrlyq jaǵdaıy, eger naýqas «aýyr jaǵdaıda» jáne oǵan shuǵyl medıtsınalyq kómek kerek bolsa, jansaqtaý bólimi jiberiledi nemese kómek qarqyndy terapııa bóliminde kórsetiledi», - dep jalǵastyrdy ol.
Kelesi bolyp oqshaýlaý ǵımaratyn kórsetti. «Munda koronavırýs ınfektsııasyna PTR-test jasaý úshin murynnan jaǵyndy alynyp, barlyq taldaýlar elektrondy bazaǵa engiziledi. Sosyn naýqas oqshaýlaý bólimine jatqyzylady. Bizdegi palatalar 3-4 orynǵa eseptelgen», - dedi №1 qalalyq aýrýhananyń bas dárigeri.
Epıdemıologııalyq jaǵdaıdyń kúrt nasharlaýyna baılanysty qalanyń aýrýhanalarynda naýqastardyń sany kóbeıdi. «Dárigerler barlyq naýqastarǵa qajetti medıtsınalyq kómekti tolyq kólemde kórsetip jatyr», - dedi aýrýhanada.
Buǵan deıin habarlanǵandaı, 20-21 maýsymda Nur-Sultanda qoǵamdyq kólikteriniń jumysy jáne qala tirshiligin qamtamasyz etetin kásiporyndar, dárihanalar men úıdiń aýlasyndaǵy azyq-túlik dúkenderinen basqa uıymdardyń jumysy toqtatylady (jumys kestesi 10.00-17.00 aralyǵanda).
Sondaı-aq barlyq qoǵamdyq oryndar: saıabaqtar, gúlzarlar, jaǵalaýlar, jaǵajaılar men basqa da adam kóp jınalatyn jerler jabyq bolady. Nur-Sultanda aýqymdy dezınfektsııalaý jumysy júrip jatyr. Zalalsyzdandyrýmen adam kóp júretin jerlerdiń barlyǵy qamtyldy. Dezınfektsııany mamandar jaıaý júrip jáne arnaıy tehnıkanyń kómegimen jasap jatyr.