Karantın: Bıylǵy úsh aıda 12,1 myń adam ýaqytsha jumyssyz qalǵan

NUR-SULTAN. QazAqparat – Bıylǵy birinshi toqsanda karantındik shekteýlerge baılanysty 12 myńnan astam adam ýaqytsha jumysynan aıyryldy. Bul týraly QR Strategııalyq josparlaý jáne reformalar agenttigi Ulttyq statıstıka bıýrosynan málim etti, dep habarlaıdy QazAqparat.

2021 jylǵy I toqsanda respýblıkada jumyspen qamtylǵandar sany 8,8 mln adamdy qurady. Onyń ishinde 6,7 mln adam nemese jumyspen qamtylǵandardyń jalpy sanynyń 76,3% jaldamaly qyzmette eńbek etedi.

Jumyssyzdar sany 451 myń 300 adamdy qurady, jumyssyzdyq deńgeıi – 4,9%.

Aqparatqa sáıkes, bıylǵy I toqsanda eńbek naryǵyna koronavırýsqa baılanysty engizilgen karantındik sharalar áser etken. 2020 jyldyń IV toqsanymen salystyrǵanda, jumys kóleminiń tómendeýinen (tolyq emes jumys kúni) nemese jumys berýshiniń bastamasyna baılanysty eńbekpen az saǵat qamtylǵandar sany 7% artty nemese 259 myń 400 adamdy qurady.

Kásiporyn qyzmetiniń toqtaýyna baılanysty ýaqytsha jumys istemeıtinder sany 12 myń 100 adamdy qurady. Onyń ishinde 40,9% - saýda qyzmetkerleri, 13,1% - kórsetiletin qyzmetterdiń ózge de túrleri, 6,9% - kólik jáne jınaqtaý, 5,8 - bilim berý salalarynda.

2021 jylǵy sáýir aıynyń sońyndaǵy jaǵdaı boıynsha, jumyspen qamtý organdarynda jumyssyz retinde resmı tirkelgender sany – 215 myń adam. Tirkelgen jumyssyzdar úlesi jumys kúshi sanynyń 2,3% quraıdy.