Karantın: Belgııada aıyppul kólemi úsh ese artady
NUR-SULTAN. QazAqparat – Belgııada prokýratýra alqasynyń otyrysy ótip, onda koronavırýs indetine qarsy kúres boıynsha birqatar sheshim qabyldandy, dep habarlaıdy «QazAqparat» HAA menshikti tilshisi.
Otyrysta qabyldanǵan sheshim boıynsha karantın kezeńinde basqosý nemese kesh uıymdastyrǵan adamdarǵa aıyppul 250-den 750 eýroǵa deıin arttyrylmaq. Bolashaqta mundaı sharalardy uıymdastyrýshylarǵa 4 myń eýro aıyppul salynady.
Belgııa buqaralyq aqparat quraldarynyń habarlaýynsha, osylaısha prokýrorlar jeke adamdardyń karantın talaptaryn saqtaýyna basa mán bergizbek. Belgııada karantındi óreskel buzatyn azamattar zańsyz keshterdi kóptep uıymdastyratyny anyqtalǵan.
Máselen, demalys kúnderi Belgııa polıtsııasy Laekendegi 50-den astam adam jınalǵan jeke keshti toqtatqan. Uıymdastyrýshylar avtobýs pen kásibı mýzykalyq jabdyqty oıyn-saýyq úshin paıdalanǵan.
Sonymen qatar Rojdestvo sekildi otbasylyq jıyndardy uıymdastyrǵandarǵa salynatyn aıyppul kólemi 250 eýro mólsherinde qalady.
Odan bólek Belgııanyń prokýratýrasy zańsyz keshterdi uıymdastyrý úshin qoldanylǵan qurylǵylardy tárkileýdi de kózdep otyr.
«Dybys údetýshi júıeler, bardyń kerek-jaraqtary, mobıldi telefondar, tipti avtokólikterge deıin tárkilenýi múmkin», - dep eskertedi prokýrorlar.
