Karantın aımaǵyna ótpek bolǵan 457 adam jaýapkershilikke tartyldy
NUR-SULTAN. QazAqparat – Qazaqstanda tótenshe jaǵdaı rejımin saqtamaýdyń 4 myńǵa jýyq faktisi anyqtaldy. Іshki ister mınıstri Erlan Turǵymbaev osyndaı málimetpen bólisti, dep habarlaıdy QazAqparat tilshisi.
«Zań buzýshylarǵa qatań sharalar qabyldanyp jatyr. Karantındik aımaqtardyń shekarasyn kesip ótýge áreket jasaǵany úshin 457 quqyq buzýshy jaýapkershilikke tartyldy. Tótenshe jaǵdaı rejımin saqtamaýdyń 4 myńǵa jýyq, jalǵan aqparat taratýdyń 79 faktisi anyqtaldy. Sonymen qatar, tótenshe jaǵdaı kezeńinde jeke qorǵanys quraldaryn zańsyz satýǵa jol bermeýge tyrysyp jatyrmyz. 2 mln medıtsınalyq maskany, 12 myń lıtr dezınfektsııalyq ónimdi jáne 4 myń qorǵanys kostıýmderin joǵary baǵamen satýdyń 28 faktisi anyqtaldy», - deıdi ol.
Mınıstrdiń aıtýynsha jeke quramnyń densaýlyǵyn saqtaýǵa da mańyz berilip otyrǵanyn aıtady. Barlyq bólimshede medıtsınalyq-profılaktıkalyq baqylaý uıymdastyrylǵan.
«Qylmystyq-atqarý júıesi mekemeleriniń tigin tsehtarynda maska óndirisi iske qosyldy. Búginde 1 mln dana daıyndaldy. Budan basqa, karantın is-sharalaryna qatysatyn jeke quram úshin arnaıy kostıýmder tigý óndirisi bastaldy. 599 jıyntyq tigildi. Atalǵan sharalar bizdiń qyzmetkerlerimizdi qorǵaý quraldarymen tolyqtaı qamtamasyz etýge, sondaı-aq sottalǵandardy eńbekpen qamtýǵa múmkindik beredi», - deıdi mınıstr.
