Karantın aýmaǵyndaǵy volonter: El taǵdyrynan ózimdi bólip qaraı almaımyn
Jas volonter el taǵdyrynan óz taǵdyryn bólip qaramaıtynyn jetkizdi.
«Biz táýlik boıy jumys isteımiz. Sebebi medıtsınalyq personal jetispeıdi. Volonterlerdi jınap jatqanyn dáriger qyzmetindegi aǵamnan estidim. Alaıda aǵam meni ala qoımaıtynyn, medıtsınalyq bilimi bar azamattar qosyla alatynyn jetkizdi. Kóp oılanǵan joqpyn: tapqan telefon nómirine habarlasyp, kópke kómekteskim keletinin aıtyp, áıteýir túsindirgendeı boldym. Qıyndyq búkil eldiń basyna túskennen keıin osyndaı sheshim qabyldap otyrmyn. El taǵdyrynan ózimdi bólip qaraı almaımyn. Medıtsınalyq uıymdarda jumys isteý tájirıbem baryn dáleldegennen keıin volonterlik qyzmetimdi jalǵastyryp kettim», - deıdi Seıilhan Musaev «Karantın aýmaǵy. Volonterlar» atty shaǵym fılmde.
Seıilhannyń anasy Janar Baıanova kenje ulynyń sheshimine áý basta qarsy bolǵan eken.
««Ulym men qazir ósip-jetilgen adammyn. Elge kómektesýim kerek» dedi. Ulymnyń sheshimin syılaımyn. Bálkim múmkindik bolsa men de volonter bolar ma edim», - deıdi ol.
Koronavırýs juqtyrǵan azamattarmen baılanysta bolǵandardy qabyldap, oqshaýlaıtyn emhana sıpatynda jasaqtalǵan «Ramada» qonaq úıinde qazir 300-ge tarta adam jatyr. Medıtsınalyq qyzmetkerlerge volonterler táýlik boıy kómektesedi.
Eske sala ketsek, búgin QR Prezıdenti Teleradıokesheni «Karantın aýmaǵy. Volonterler» atty shaǵyn fılmdi jarııalaǵan bolatyn. Shaǵyn fılmde koronavırýs juqtyrǵan azamattarmen baılanysta bolǵandardy qabyldap, oqshaýlaıtyn emhana sıpatynda jasaqtalǵan «Ramada» qonaq úıindegi eksklıýzıvti kadrlar beınelengen.
Medıtsınalyq qyzmetkerlermen birge júzdegen volonter táýlik boıy oqshaýlanǵan azamattardy baqylap, olarǵa qyzmet kórsetip keledi. Volonterler emhanada jabyq rejımde ómir súredi. Qonaq úı aýmaǵynan tek medıtsınalyq qyzmetkerlermen birge kete alady.