Karantın: Aýlalardy jáne oıyn alańdaryn ashý máselesi pysyqtalady
NUR-SULTAN. QazAqparat – Memlekettik komıssııa ákimdiktermen birlesip, aýlalardy jáne oıyn alańdaryn ashý máselesin oılastyrýǵa tıis. Bul týraly QR Prezıdenti Qasym-Jomart Toqaevtyń málimdemesinde atalyp ótti, dep habarlaıdy QazAqparat.
«Oqshaýlaný kezinde ata-analarǵa kishkentaı balalarymen tórt qabyrǵaǵa qamalyp otyrý ońaı emes. Memlekettik komıssııa ákimdiktermen birlesip, aýlalardy jáne oıyn alańdaryn ashý máselesin oılastyrýǵa tıis. Árıne, aldymen, barlyq sanıtarlyq normalar men sanıtarlyq qaýipsizdik talaptary qatań saqtalýy kerek», - dedi Memleket basshysy.
Sonymen qatar Qasym-Jomart Toqaev saıajaıda jumys isteıtinderge qatysty másele qarastyrylǵanyn atap ótti.
«Saıajaı ıeleri de qatty alańdap otyr. Óıtkeni, qazir kóktemniń dál ortasy, jurtqa qolaıly kezeń. Memlekettik komıssııa bul máseleni qarastyrdy, endi ony sheshý jolyn aıtady», - dedi Prezıdent.
