Karantın: Atyraýda dámhanalardyń jumys ýaqyty ózgerýi múmkin
ATYRAÝ. QazAqparat –Atyraýda meıramhanalar men dámhanalardyń jumys ýaqyty ózgerýi múmkin, dep habarlaıdy QazAqparat.
Atyraý oblysynda 700-ge jýyq qoǵamdyq tamaqtaný orny tirkelgen. Olardyń 400-den astamy oblys ortalyǵynda, 300-ge jýyǵy aýyldarda ornalasqan.
Buǵan deıin meıramhanalar men dámhanalardyń jumys ýaqyty keshki 20:00-ge deıin qysqarǵan edi.
Osyǵan oraı Atyraý oblysynyń kásipkerler men jumys berýshiler odaǵynda qoǵamdyq tamaqtaný oryndarynyń jumys isteý ýaqytyna qatysty másele qaraldy. Jıynǵa meıramhanalar men dámhanalardyń ıeleri, sondaı-aq Atyraý qalasy men oblysynyń bas sanıtarlyq dárigerleri qatysty. Kásipkerler jumys ýaqytyn saǵat 20.00-den 00.00-ge deıin uzartý týraly máseleni kóterdi.
«Atyraý oblysynyń bas sanıtarlyq dárigeriniń sońǵy qaýlysyna sáıkes meıramhanalar men dámhanalardyń jumysyna saǵat 20:00-ge deıin ǵana ruqsat etilgen. Alaıda, klıentter keshki saǵat 20:00-den 22:00-ge deıin. Bul – qyzmetkerler shtatyn ustaý, kommýnaldyq tólemderdi men nesıelerdi tóleý, basqa da operatsııalyq shyǵystardy jabý úshin aqsha taba alatyn ýaqyt» -deıdi kásipker Nurlan Muqyshev.
Kásipkerlerdiń aıtýynsha, jumys ýaqytyn shekteý shyǵynǵa ushyratyp otyr. Óıtkeni tabystyń 90%-ǵa jýyǵy juma kúni keshke jáne demalys kúnderi túsedi.
«Demalys kúnderi meıramhanalar men dámhanalar bir saǵatta aılyq taýar aınalymynyń 20%-yn tabady. Sol sebepten, jeke turǵan meıramhanalar men dámhanalarǵa bir adamǵa 5 sharshy metr jaǵdaıda saǵat 00:00-ge deıin jumys isteýge ruqsat berýdi suraımyz» - deıdi QR qoǵamdyq tamaqtaný qaýymdastyǵynyń keńesshisi Veronıka Nurpeıisova.
Atyraý oblysynyń bas sanıtarlyq dárigeri Mádenıet Tanaýov bul máseleni eki táýlik ishinde qaraýǵa ýáde berdi.
«Eger bir aptada aımaqtaǵy epıdemıologııalyq jaǵdaı nasharlamasa, aımaq «sary» aımaqta qalýdy jalǵastyrsa, biz meıramhanalar men dámhanalardyń jumys ýaqytyn saǵat 00:00-ge deıin uzartý múmkindigin qarastyramyz» - deıdi Mádenıet Tanaýov.
Eske salsaq, QR Bas memlekettik sanıtarlyq dárigeri Erlan Qııasovtyń karantın sharalaryn jeńildetý týraly jańa qaýlysy jarııalanǵan bolatyn.
Qaýly erejelerine sáıkes, «jasyl» aımaqtaǵy óńirlerde meshitterge jurttyń jınalýyna, sonymen qatar mektep ashanalarynyń jumysyna ruqsat berildi.
