Karantın: «Atameken» balabaqsha salasyndaǵy problemany kóterdi
NUR-SULTAN. QazAqparat – «Atameken» UKP alańynda karantın kezeńindegi balabaqshalardyń jumysy men ózekti problemalary talqylandy, dep habarlaıdy QazAqparat tilshisi.
«Tótenshe jaǵdaı rejımi aıaqtalǵannan keıin jeke balabaqshalardyń jumysy qalaı jalǵasatyny, qarjylandyrý qalaı júrgiziletini týraly suraq týyndady. Elde 4 428 balabaqsha bar. 339 myń adam jeke balabaqshalarǵa barady. Qazirgi tańda qatty zardap shegip jatqan salalardyń biri – jeke bilim berý uıymdary. Myna málimdeme oryndy bolar dep esepteımin: mektepke deıingi bilim berýdiń jeke sektory qazir quryp ketý aldynda tur. TJ ýaqytynda balalar balabaqshaǵa barmaǵannan keıin memlekettik tapsyrys boıynsha qarajat berilgen joq. TJ rejımi aıaqtalǵannan keıin memlekettik tapsyrysty qalaı saqtap qalý kerek degen másele týyndady», - deıdi palatanyń basqarma tóraǵasynyń orynbasary Oljas Ordabaev «Atameken» UKP onlaın-jınalysy barysynda.
Onyń aıtýyna qaraǵanda dál osy kezeńde jeke balabaqshalardyń qyzmetkerleriniń aılyǵyn tólep otyrý kerek.
«70 myń qyzmetker aılyqsyz qalýy múmkin (mektepke deıingi bilim berý uıymdarynda). Sol sebepti biz óte ózekti máselemen betpe-bet kelip otyrmyz. Bizdiń oıymyz – naqty sıpatqa ıe. Bilim jáne ǵylym mınıstrligimen birge qazir jeke balabaqshalardy qoldaý, olardyń qyzmetkerlerine eń tómengi aılyq mólsherin berip otyrýǵa qatysty máseleni talqylaǵan edik. Olar jabylyp qalmaýy tıis. Karantın ýaqyty aıaqtalǵannan keıin balalar qaıtadan balabaqshalarǵa bara alatyndaı jaǵdaı bolýy tıis», - dedi Oljas Ordabaev.
Qazirgi tańda elde 10 314 mektepke deıingi uıym bar. Onyń 4 428-i – jeke balabaqshalar.
