Karantın: Arysta týǵan kún men túlekter keshine 100-den astam qonaq jınalǵan

ARYS. QazAqparat - Túrkistan oblysynda karantınge qaramastan jasalǵan týǵan kún men túlekter otyrysy anyqtaldy, dep habarlaıdy QazAqparat.

Koronavırýs indetiniń taralýyn boldyrmaý, aldyn alý maqsatynda Túrkistan oblysynda mobıldik toptar qurylyp, qyzmet atqarýda.

Mobıldi top quramynda tártip saqshylary da bar. Osyndaı kezekti tekseris kezinde Arys qalasy Saıajaı eldi mekeninde ornalasqan demalys ornynda týǵan kún bolyp jatqanyn anyqtady.

Tekserý barysynda jıynda 50-den astam qonaq bolǵan.

Osyǵan baılanysty sanıtarııalyq talaptardy saqtamaǵan demalys ornynyń ıesi men týǵan kún ıesine QR ÁQBtK 425-babymen is-qujattary rásimdeldi.

Jınaqtalǵan qujattar ákimshilik shara kórilý úshin sanıtarııalyq-epıdemıologııalyq baqylaý basqarmasyna joldandy.

Sonymen qatar tártip saqshylary Arys qalasyndaǵy Táýelsizdik kóshesindegi úılerdiń birinde bolyp jatqan túlekter otyrysyn anyqtady.

Mektep bitirýshi oqýshylardyń qoshtasý keshine 50-ge tarta qonaq kelgen.

Karantın talaptaryn saqtamaı, adamdardyń kóptep shoǵyrlanýyna jol bergen úı ıesine qatysty QR ÁQBtK 425-baby boıynsha is-qujattar jınaqtalyp, zańdy sheshim qabyldaý úshin Arys aýdandyq SEBB-ǵa joldandy.

Jalpy jyl basynan beri Arys aýdanynda 100-den astam karantın talabyn saqtamaǵandar anyqtalǵan.

Onyń ishinde 15-i týǵan kún, toı-jıyn ótkizý derekteri boıynsha tirkelgen.

Túrkistan oblysynyń polıtseıleri barlyq azamattardy koronavırýs indetine baılanysty shyǵarylǵan qaýly talaptaryn saqtaýǵa shaqyrady.

«Áleýmettik araqashyqtyqty saqtap, betperde rejımin ustanyńyzdar. Adam kóp bolatyn jerlerge barmańyzdar» dep keńes beredi polıtsııa.