Karantın alynǵannan keıin elorda emhanalarynda qandaı qyzmetter kórsetiledi
NUR-SULTAN. QazAqparat - 10 tamyzdan bastap elordanyń barlyq emhanalarynda aldyn ala jazylý boıynsha josparly túrde qabyldaý júrgizilip jatyr. Bul týraly Nur-Sultan qalasynyń qoǵamdyq densaýlyq saqtaý basqarmasynyń basshysy Tımýr Muratov aıtty, dep habarlaıdy QazAqparat tilshisi.
Tımýr Muratovtyń aıtýynsha, dárigerler eresekter men balalarǵa profılaktıkalyq tekserý júrgizedi.
«Onyń ishinde skrınıng, josparly stomatologııalyq qyzmetter, ońaltý qyzmetteri, medıtsınalyq-áleýmettik qoldaý, medıtsınalyq-áleýmettik saraptamaǵa medıtsınalyq qujattardy resimdeý, psıhologııalyq kómek, kúndizgi statsıonarlardyń jumysy, táýliktik jáne kúndizgi statsıonarlarǵa josparly emdeýge jatqyzýǵa jiberý bar. Іs-sharalar kúsheıtilgen sanıtarlyq-epıdemologııalyq normalardy saqtaı otyryp júrgiziledi. Jumys kúnderi saǵat 08:00-den 17:00-ge deıin», - dedi ol.
Sondaı-aq onyń atap ótýinshe, koronavırýs ınfektsııasy belgileri bar adamdardy qabyldaý boıynsha fıltr-kabınettiń jumysy jalǵasýda. Qazirgi ýaqytta qalada táýligine 5,5 myń zertteý qýaty bar 9 PTR-zerthana jumys isteıdi. Olarda barlyǵy 305 myńnan astam zertteý júrgizildi.
Ákimdik medıtsına mekemelerine 600-den astam floýmetr, 500 ottegi kontsentratory, 500 arnaıy kerýet, jasandy tynys alý jáne kompıýterlik tomografııa apparattaryn jetkizdi. Shilde aıynda eki apta ishinde qalaǵa pnevmonııa, koronavırýs jáne basqa da aýrýlardy emdeýde qajet 110 tonnadan astam dári-dármek jetkizildi. Bul jumystardy ákimdik turaqty negizde júrgizedi.
