Karantın: Almatynyń aýasyn kólikter qanshalyqty lastaıtyny anyqtalmaq
NUR-SULTAN. QazAqparat – Almatyda karantın rejıminiń engizilýine baılanysty kólik sany azaıyp, QR Ekologııa, geologııa jáne tabıǵı resýrstar mınıstrligine qalada aýa lastanýynyń naqty kózderin anyqtaý múmkindigi týdy, dep habarlaıdy QazAqparat mınıstrlikke silteme jasap.
Osyǵan oraı, Almaty qalasynyń birneshe núktesinde aýadaǵy lastaýshy zattardyń shoǵyrlanýyna jospardan tys ólsheý júrgiziledi.
«Qazaqstan Respýblıkasynda tótenshe jaǵdaıdyń jarııalaýyna jáne karantınniń engizýine baılanysty Almaty qalasynda alǵash ret avtomobıl kóliginiń sany aıtarlyqtaı tómendedi. Osylaısha Almaty qalasynda atmosferalyq aýanyń negizgi lastaný kózin anyqtaýǵa múmkindik týdy. Jylý elektr ortalyǵynyń jalpy qala aýasynyń sapasyna qanshalyqty áser etetinin jáne Almaty qalasyndaǵy kólik kóp júretin kóshe qıylystaryndaǵy aýanyń lastanýyn anyqtaý maqsatynda QR Ekologııa, geologııa jáne tabıǵı resýrstar mınıstriniń tapsyrmasymen «Qazgıdromet» RMK 20 naýryzdan bastap karantın boıy jáne ol aıaqtalǵannan keıin bir aı boıy kelesi núktelerde aýadaǵy lastaýshy zattardyń shoǵyrlanýyna jospardan tys ólsheý júrgizetin bolady: Saıahat avtovokzaly aýdanynda; Tastaq bazarynyń aýdanynda; JEO-2 sanıtarlyq-qorǵaý aımaǵynyń shekarasynda«, - delingen mınıstrliktiń Telegram-paraqshasynda jarııalanǵan aqparatta.
Vedomstvo málimetinshe, taldaý sınoptıkalyq jaǵdaıdy eskere otyryp júrgiziledi. Sondaı-aq jospardan tys ólshemderden bólek QR Ekologııa, geologııa jáne tabıǵı resýrstar mınıstrligi «Qazgıdromet» RMK-niń aýanyń lastanýyn baqylaý beketterindegi datchıkterdiń derekteri qoldanylady.
