KARANTIN: Almatyda jolaýshylar aǵymy 64%-ǵa tómendedi
ALMATY. QazAqparat – Almatyda koronavırýs taralýyna baılanysty sońǵy aptada jolaýshylar aǵymy 64%-ǵa tómendedi, dep habarlaıdy QazAqparat tilshisi.
Qalalyq mobıldilik basqarmasynyń sheshimimen karantın rejımi kezinde Almaty qalasyndaǵy qoǵamdyq kólik, atap aıtqanda avtobýs marshrýttary men metropolıten shtattyq rejımde jumys isteıdi.
«Alaıda almatylyqtardy erkin tasymaldaý úshin avtobýstar josparly túrde 95% jolǵa shyǵyp júr. Qalaaralyq jáne qala mańy marshrýttary karantın kezine jumystaryn ýaqytsha toqtatty. Sońǵy apta ishinde jolaýshylar aǵymy 64%-ǵa tómendegen», - dedi basqarmadan.
Sonymen qatar, Shyǵys Qazaqstan, Túrkistan, Qyzylorda, Soltústik Qazaqstan jáne Almaty oblysy baǵyttaryndaǵy 49 qalaaralyq marshrýt, sondaı-aq qala mańynan qatynaıtyn 63 turaqty qala jáne qala mańy marshrýty, jalpy 759 avtobýs ýaqytsha toqtatyldy. Qazirgi rejımge sáıkes qala syrtymen ótetin 6 turaqty qala marshrýtynyń syzbalaryna ózgeris engizildi (14, 16, 52, 115, 124,125, 208)
Avtobýstardy dezınfektsııalaý úshin sanıtarlyq óńdeýmen aınalysatyn eki kompanııamen kelisim jasaldy. Olar barlyq avtoparkterdegi avtobýstardy túngi ýaqytta dezınfektsııalaýmen aınalysady. Kúndiz sońǵy aıaldamalarda jyljymaly sanıtarlyq óńdeý beketteri jumys istep jatyr.
Metropolıten jumysy boıynsha, qazirgi kezde jolaýshylar aǵymy 70%-ǵa tómendedi. Alaıda metro jumysy shtattyq rejımde jalǵasýda. Depolarda vagondar tolyq dezınfektsııalanady.
