Karantın: Almaty oblysynda toı jasaǵandarǵa 89 mln teńge aıyppul salyndy

TALDYQORǴAN. QazAqparat - Almaty oblysynda monıtorıngtik top karantın kezinde toı ótkizýdiń 233 jaǵdaıyn anyqtady, - dep habarlaıdy QazAqparat tilshisi.

«Halyqtyń sanıtarııalyq-epıdemııaǵa qarsy jáne sanıtarııalyq-profılaktıkalyq is-sharalardyń saqtalýyn baqylaý maqsatynda Almaty oblysy boıynsha jergilikti atqarýshy organdardyń janynan 268 monıtorıngtik top quryldy.

Jyl basynan beri monıtorıngtik toptar 28 463 reıd júrgizdi. 152 288 nysandy qamtyp, 1369 karantın rejımin buzý faktisi anyqtaldy. Nátıjesinde 735 nysanǵa 89 mıllıon teńgege aıyppul salyndy. Onyń 233-i jappaı otbasylyq jáne ujymdyq is-sharalardy, ıaǵnı toı, uzatý, qudalyq jáne týǵan kúnder ótkizý boıynsha qoǵamdyq tamaqtaný nysandarynda ynaqtyldy. Karantın men maska rejımin saqtamaǵany úshin jeke tulǵalarǵa 592 hattama toltyryldy,-dep málimdedi Almaty oblysy sanıtarlyq-epıdemıologııalyq baqyldaý departamentiniń baspasóz qyzmetinen.

2020 jyldyń qarasha aıynyń basynan bastap, búgingi kúnge deıin Eńbekshiqazaq (13), Eskeldi (1), Jambyl (2), Talǵar (4) aýdandary men Qapshaǵaı (1), Taldyqorǵan (6), Tekeli (1) qalalarynda, 28 shaǵyn kásipkerlik nysanynda barlyǵy quqyq buzýshylyq faktisi anyqtaldy. 18 nysan boıynsha aýmaqtyq prokýratýra organdaryna hat joldandy, 16 nysanǵa jospardan tys tekserý júrgizildi, saldarynan jeke tulǵalarǵa – 57.992.60 teńge somasynda 12 hattama toltyryldy.

Aıta keteıik, óńirde úılestirý ortalyqtary jumys isteıdi. Jyl basynan beri ortalyqqa 156 shuǵyl habarlama kelip túsken. Tekseris barysynda karantın talaptaryn buzý dereginiń 90 jaǵdaıy qoǵamdyq tamaqtaný nysandarynda bolǵandyǵy anyqtaldy.