Karantın: Almaty oblysynda qalaaralyq avtobýstar qaıta júre bastaıdy
TALDYQORǴAN. QazAqparat - Almaty oblysynda karantın talaptaryn kezeń-kezeńmen jeńildetý jalǵasýda, - dep habarlaıdy QazAqparat tilshisi.
Almaty oblystyq Bas memlekettik sanıtarııalyq dárigeri Erǵalı Sydymanov N27 qaýlysy 31 tamyz kúni saǵat 07:00-de kúshine enedi. Atalmysh qaýly talaptaryna sáıkes, oblystyń tamaqtaný oryndary 30 adamǵa deıin ǵana qabyldaýǵa ǵana quqyly, alaıda olarǵa toı, banket jasaýǵa bolmaıdy. Sondaı-aq atalmysh nysandar 17 tamyzdan bastap túngi saǵat 22:00-ge deıin jumys istese, endi olardyń jumys ýaqyty bir saǵatqa nemese saǵat 23:00-ge deıin uzartyldy. Al, 31-shi tamyzdan bastap qalaaralyq avtobýstardyń jumysy qaıta jandanady.
Oblystyń aýdandary men qalalary arasynda, sondaı-aq oblys sheginen tys jerlerde jolaýshylardy tasymaldaıtyn qoǵamdyq kólik qozǵalysyna ruqsat berildi. Bul rette ár reıs aldynda qoǵamdyq kólikti, qoǵamdyq kólik aıaldamalaryn (kúnine keminde eki ret), jýý jáne dezınfektsııalaý quraldaryn, qoldana otyryp óńdeý júrgizý qajet bolady.
Aıta ketetin másele, atalǵan qaýly talaptaryna saı, basseınderdiń jumys isteýine ruqsat berildi. Al túngi klýb, kalıan barlary, qalalyq jáne qoǵamdyq jaǵajaılar, ashyq akvaparkter, oıyn-saýyq nysandary (kórmeler, býkmekerlik, bılıard, karaoke, PS-klýbtar, kvestdar, antıkafe, boýlıng-ortalyqtar, loto-klýbtar, kompıýterlik klýbtar, batýttar jáne t.b.) jumys istemeıdi.
