Karantın Almaty ekologııasyna qalaı áser etti
ALMATY.QazAqparat – Dúnıejúzi sarapshylarynyń aıtýynsha, pandemııa ekologııaǵa oń áser etti. Adamzat tirshiligindegi áreketter azaıǵan saıyn atmosfera tazaryp, sý tunyq bola bastaǵan. Al Almatynyń aýasy qanshalyqty tazardy? Bul týraly otandyq ekologtar aıtyp berdi, dep habarlaıdy QazAqparat tilshisi.
Almaty Polıtsııa departamentiniń resmı málimetterine sáıkes, qalada kólikter sany bes ese azaıdy. Ekologtar munyń qalalyq ortaǵa jáne ekologııaǵa, ásirese, turǵyndar jıi shaǵymdanatyn aýa sapasyna qalaı áser etkenin aıtty.
Ekobelsendi Tımýr Eleýsizovtiń sózinshe, aýa taza bola bastady jáne búkil qalada atmosfera birneshe sebepterge baılanysty jaqsaryp keledi.
«Megopolıste kólik qozǵalysy azaıǵaly aýa birshama tazaryp qaldy. Bul birden baıqalady. Onyń qanshalyqty tazarǵanyn aıta almaımyn. Óıtkeni munda arnaıy datchıktermen hımııalyq analız jasaý qajet. Jalpy, atmosfera ózgerdi, jaqsy dınamıka bar. Tipti jıi jaýyp jatqan jańbyr da Almaty ekologııasyna jaqsy áser etýde», - deıdi ol.
Óz kezeginde taza kólikti damytý jónindegi sarapshy Elena Erzakovıch karantınniń aýa sapasyna qalaı áser etkeni týraly suraqqa jaýap berý múmkin emestigin atap ótti.
«Datchıkti qoldaný arqyly kólikterdiń ekologııany lastaýǵa qosatyn úlesi týraly eshkim naqty aıta almaıdy. Tótenshe jaǵdaı kezinde azaıǵan kólik qozaǵalysy arqyly da anyqtaý múmkin emes. Ol úlken kólemdi málimetterdi qajet etedi. Qazirgi ýaqytta qalada ártúrli ekologııalyq sanattaǵy qanshama avtokólik bar. Olardyń tehnıkalyq jaǵdaıy qandaı, janarmaıdyń qaı túrin quıady, kúnine qansha shaqyrym júredi? Mine, osynyń barlyǵy esepke alynýy kerek. Sondyqtan men birazdan beri aýany lastaıtyn zattarǵa qatysty daýlarǵa qatyspaımyn. Qazir qala turǵyndaryna ózderiniń úlesteri men problemalaryn sheshý joldaryn uǵynýdyń qanshalyqty mańyzdy ekenin túsindirýdi jón kóremin. Kólik jáne energetıka salasy arasynda jaýapkershilikti bólisip, jaǵdaıdy eki baǵytta jaqsartý úshin jumysty jalǵastyrý qajet dep oılaımyn»,– deıdi sarapshy.
«Qazgıdromet» RMK Almaty fılıalynyń málimetinshe, atmosferalyq aýaǵa monıtorıng 16 postta júrgizilip otyrady. Onyń 11-i avtomatty, 5-eýi qolmen irikteledi. 31 naýryz ben 6 sáýir aralyǵynda ruqsat etilgen normadan asatyn 117 jaǵdaı tirkeldi.
