Karantın: Aqtóbede kásipkerlerge 7 mln teńge aıyppul salyndy
AQTÓBE. QazAqparat – Aqtóbede mobıldi top kásipkerlik sýbektilerin jospardan tys tekserip jatyr, dep habarlaıdy QazAqparat tilshisi.
5 shildeden bastap quramyna oblystyq taýarlar men kórsetiletin qyzmetterdiń sapasy men qaýipsizdigin baqylaý departamentiniń mamandary engen mobıldi top tekserý júrgizip jatyr. Barlyǵy 745 nysan qamtyldy.
«Tekserý kezinde 47 hattama toltyrylyp, jalpy somasy 4 mıllıon teńgege jýyq aıyppul salyndy. Qalǵan materıaldar qaralý ústinde. Bul baǵyttaǵy jumystar jalǵasa beretin bolady. Oblystyq taýarlar men kórsetiletin qyzmetterdiń sapasy men qaýipsizdigin baqylaý departamenti koronavırýs ınfektsııasynyń aldyn alý, qoǵamdyq oryndarda betperde taǵý, qoldy jıi jýý, antıseptıkterdi paıdalaný jáne áleýmettik dıstantsııany saqtaý talaptaryn oryndaýǵa shaqyrady. Farmatsevtıka salasyn tekserý kezinde 30 ákimshilik is qozǵaldy. Іri kásipkerlik sýbektisine 7 mıllıon teńge, shaǵyn kásipkerlik sýbektisine 277 800 teńge kóleminde ákimshilik aıyppul salyndy. Barlyǵy 16 shaǵyn kásipkerlik sýbektisi 3 mıllıon teńgege jýyq aıyppul tóleıdi», - dep habarlady taýarlar men kórsetiletin qyzmetterdiń sapasy men qaýipsizdigin baqylaý departamentiniń baspasóz qyzmeti.
