Qarańǵylyqtan basqa bereri joq eskilik ustanymdaryna qatań tosqaýyl qoıýymyz kerek — Prezıdent
ASTANA. KAZINFORM — Qarańǵylyqtan basqa bereri joq eskilik ustanymdaryna qatań tosqaýyl qoıýymyz kerek. Bul týraly Qazaqstan Halyq Keńesiniń birinshi sessııasynda Memleket basshysy Qasym-Jomart Toqaev aıtty.
— Tarıhty durys tanı bilý — eń qajetti daǵdy. Ótkenge ókpe artý — bolashaqqa balta shabýmen teń áreket. Aınalasyna kiná taǵyp, únemi jubanysh izdep júretin adamnyń da, ulttyń da keleshegi bulyńǵyr bolady. Mundaı kertartpa ádetterden aýlaq bolý kerek. Kúndelikti ómirde de muńǵa batpaı, eńseni tik ustap júrgen jón. Óskeleń urpaqty jasyq, kinámshil, ýaıymshyl minezden saqtaý qajet. Olar ultynyń tarıhyn maqtan etip, elimizdiń bolashaǵyna senimmen qaraýy kerek, — dedi Prezıdent.
Osy oraıda Memleket basshysy qazaqtyń birtýar jazýshysy Muhtar Áýezovtiń «El bolamyn deseń, besigińdi túze» degen jaqsy sózi bar ekenin eske saldy.
— Urpaq tárbıesi — el bolashaǵynyń kepili. Sondyqtan biz qazir «Adal Azamat» birtutas tárbıe baǵdarlamasyn júzege asyryp jatyrmyz. Bul jumysqa atústi qaramaı, sapaly atqarý kerek. Qazaq qıly zamandardan qaıyspaı ótken, ór rýhyn jyqpaǵan, qaısar, jigerli ult bolǵan. Biz ata dástúrimizdi, asyl dinimizdi, ana tilimizdi, biregeı bolmysymyzdy saqtaı otyryp, jańashyldyqqa, jasampazdyqqa umtylýymyz qajet. Tutas elimizge kóleńkesin túsiretin jat aǵymdarǵa, qarańǵylyqtan basqa bereri joq eskilik ustanymdaryna qatań tosqaýyl qoıýymyz kerek. Ult bolyp uıysyp, qoǵamda jańa etıka qalyptastyrýymyz qajet. Bul asa mańyzdy isti oryndaýǵa sizder — Qazaqstan Halyq Keńesiniń músheleri de eleýli úles qosasyzdar dep senemin, — dedi Qasym-Jomart Toqaev.
Aıta keteıik, jıyn barysynda Prezıdent Konstıtýtsııa ár adamnyń qolynda júretin, jumys ústelinde turatyn qujat bolýǵa tıis ekenin aıtty.
