Qaramaǵyndaǵy qyzmetkerdi bopsalaǵan polıtsııa bastyǵy 7 jylǵa sottaldy

QYZYLORDA. QazAqparat - Qyzylordada qaramaǵyndaǵy qyzmetkerinen para suraǵan qalalyq Polıtsııa basqarmasynyń burynǵy bastyǵy 7 jyl merzimge bas bostandyǵynan aıyryldy, dep habarlaıdy QazAqparat tilshisi.

Qyzylorda qalalyq Polıtsııa basqarmasynyń burynǵy bastyǵy óz paıdasy úshin sybaılas jemqorlyq qylmysyna barǵan. Ol basqarmanyń jedel ýákiline qýdalaıtynyn alǵa tartyp, ony aqsha berýge májbúrlegen.

Sottalýshy qylmystyq pıǵyly áshkere bolyp qalmaý maqsatynda aǵa jedel ýákil qyzmetin atqaratyn azamatqa jedel ýákilden aqsha ákelip berýdi suraǵan. Aǵa jedel ýákil basqarma bastyǵynyń qylmystyq pıǵylynan beıhabar bolǵan. Jedel ýákildiń ózge amaly qalmaǵandyqtan aǵa jedel ýákildiń kartochkasyna 50 myń teńge aqshany aýdarǵan. Aǵa jedel ýákil ony basqarma bastyǵyna avtokólik ishinde qolma-qol bergen.

«Qylmystyq is tolyqtaı dáleldendi. Sot úkimimen sottalýshy QR Qylmystyq kodeksiniń 366-baby 3-bóligi 1-tarmaǵymen kináli dep tanyldy. Memlekettik qyzmette laýazymdardy atqarýǵa ómir boıyna aıyryldy. Oǵan 7 jyl merzimge bas bostandyǵynan aıyrý jazasy taǵaıyndaldy», - delingen Qyzylorda qalasynyń №2 sotynyń baspasóz qyzmeti taratqan habarlamada.

Eske salsaq, Qyzylordada bıyl 22 qylmysty jasyrý deregi anyqtaldy.