Qaramaǵyndaǵy qyzmetker jemqorlyqqa jol bergen SQO ákiminiń orynbasary qyzmetinen ketti

NUR-SULTAN. QazAqparat – Soltústik Qazaqstan oblysy ákiminiń orynbasary Anton Fedıaev qaramaǵyndaǵy qyzmetkerdiń sybaılas jemqorlyǵy úshin otstavkaǵa ketti. Bul týraly QR Sybaılas jemqorlyqqa qarsy is-qımyl agenttigi málimdedi, dep habarlaıdy QazAqparat.

«Ótken aptada qaramaǵyndaǵy qyzmetkerler úshin basshylardyń otstavkaǵa ketýi týraly zańnamalyq normanyń oryndalýyna monıtorıng júrgizý aıasynda, Soltústik Qazaqstan oblysy ákiminiń orynbasary A. Fedıaev otstavkaǵa ketti. Ol oblys ákimdiginiń Memlekettik sáýlet-qurylys baqylaý jáne lıtsenzııalaý basqarmasynyń basshysy Qalabaevqa qatysty Petropavl qalalyq sotynyń úkiminen soń ketti. Qalabaev kináli dep tanylyp, belgili bir laýazymdardy atqarý quqyǵynan ómir boıyna aıyryldy jáne oǵan 26 mln 600 myń teńge aıyppul salyndy», - deıdi agenttiktiń baspasóz qyzmeti.

Agenttiktiń habarlaýynsha, otstavkany qabyldaý nemese odan bas tartý týraly sheshimdi memlekettik organ nemese memlekettik saıası qyzmetshini osy laýazymǵa taǵaıyndaǵan laýazymdy tulǵa bir aı ishinde qabyldaıdy.