Qaraly qańtarda Almatyda sherýge shyqqandar birin-biri burynnan tanyǵan - tergeýshi

ALMATY. QazAqparat - Almatylyq tergeýshi qańtar oqıǵasy kezinde kýá bolǵan oqıǵa týraly aıtty, dep habarlaıdy QazAqparat tilshisi.

Almaly aýdandyq polıtsııa basqarmasynyń tergeý bóliminiń tergeýshisi Erbol Nurmanovtyń aıtýynsha, Almatyda qańtarda bolǵan sherý alǵashynda beıbit sıpatta bolǵan. Alańǵa jınalǵandar jaı urandatyp turǵan. Alaıda, keıinnen jaǵdaı kúrt ózgergen. Ol kezde Erbol Nurmanov áriptesterimen birge qoǵamdyq tártipti qamtamasyz etý úshin qaladyq ákimdiktiń aldynda qyzmette bolǵan.

«Eshqandaı arańdatýǵa ermeı, eshkimmen sóılespeı, eshkimge qarsylyq kórsetpeı, óz mindetimizdi atqaryp turdyq. Jınalǵandar bir-birin burynnan tanıtyndaı amandasyp jatty. Qoıylǵan qorshaýlarǵa jaqyndap «biz jaqqa ótińder» degender de boldy», – dedi ol.

Tergeýshiniń aıtýynsha, búlikshiler tipti qyzmettik áskerı kólikterdi de tartyp alǵan.