Qaraly qańtar: Qyzmet barysynda qaza tapqandardyń balalaryna grant bólinedi

NUR-SULTAN. QazAqparat – Eldegi jappaı tártipsizdik kezinde qyzmet barysynda mert bolǵan jandardyń balalaryna memleket bilim grantyn bóledi. Bul týraly QR Bilim jáne ǵylym mınıstrligi joǵary jáne joǵary oqý ornynan keıingi bilim departamenti dırektory Ádilet Toıbaev málim etti, dep habarlaıdy QazAqparat tilshisi.

«Árıne, jappaı ereýil kezinde zardap shekkender men olardyń otbasyna tıisti kómek kórsetiledi. Qyzmet barysynda qaza tapqan jandardyń balalaryna bilim grantyn bólý týraly sheshim qabyldandy. Olardyń qatarynda ishki ister mınıstrligi qyzmetkerleri, órt sóndirýshiler men áskerıler bar. Qazir bul másele zań turǵysynan qaralyp jatyr», - dedi Ádilet Toıbaev OKQ-de onlaın ótken baspasóz máslıhatynda.

Buǵan deıin departament basshysy kolledj jáne JOO basshylyǵy stýdentterge beıbit sherý, ereýilderge qatysýǵa tyıym salýy múmkin be degen saýalǵa qatysty pikir bildirdi.

«Shyndyǵyn aıtqanda, stýdentterge tyıym salý týraly bizde eshqandaı aqparat joq. Joǵary oqý oryndary ondaı jumysty ótkizgen emes. Ýnıversıtet basshylyǵy tarapynan stýdentterge qysym kórsetý týraly fakti bolǵan emes. Taǵy qaıtalap aıtqym keledi, elde bolǵan jappaı tártipsizdikter kezinde stýdentter kanıkýlda boldy. Jataqhanalarǵa az ǵana stýdentter qaldy. Onyń ózi shetel stýdentteri. Eger naqty jaǵdaı oryn alǵan bolsa, biz ony tekseretin bolamyz»,- dep jaýap berdi mınıstrlik ókili.