Qaraly qańtar: Ákimshilik quqyqbuzýshylyq úshin qamaýǵa alýdy qoldanbaý usynyldy

NUR-SULTAN. QazAqparat – «Adam quqyqtary jónindegi hartııa» qoǵamdyq qorynyń basshysy, Ulttyq qoǵamdyq senim keńesiniń múshesi Jemis Turmaǵambetova ákimshilik quqyqbuzýshylyq jasaǵan azamattarǵa qamaýǵa alýdyń ornyna balamaly sharalar qoldanýdy usyndy, dep habarlaıdy QazAqparat.

«Memleket basshysy qańtar oqıǵasyna qatysty túrli quqyqbuzýshylyq boıynsha ustalǵan azamattardyń kinásiniń deńgeıin anyqtap, olardyń aýyr qylmysy bolmasa, jazany jeńildetý sharalaryn qabyldaý týraly Bas prokýratýraǵa bergen tapsyrmasy óte durys dep sanaımyn. Quqyq organdarynyń istep jatqan jumystaryna kedergi jasamaıyq. Baıqaýsyzdan osy jaǵdaıǵa ushyraǵan muqtajy tómen adamdarǵa kómek kórsetýge shaqyramyn», - dedi J. Turmaǵambetova Ortalyq kommýnıkatsııalar qyzmetinde ótken baspasóz máslıhatynda.

Spıker jappaı tártipsizdik kúnderi joramaldardyń jolyn kesip, qazirgi ahýal men quqyq qorǵaý organdarynyń is-áreketterin baǵalaýdyń obektıvtiligin qamtamasyz etýimiz kerektigin aıtty.

«Bul úshin Tótenshe jaǵdaılar men jappaı tártipsizdikter boıynsha jumys tájirıbesi bar táýelsiz sarapshylardyń nazaryn aýdarý mańyzdy. Barlyq bolǵan jaǵdaıdy, ásirese arnaıy quraldar men atys qarýyn qoldaný boıynsha jaǵdaıdy qaraý úshin halyqaralyq sarapshylardy tartý múmkindigin qarastyrý kerek. Bas jáne tómen turǵan prokýratýralar barlyq ákimshilik quqyqbuzýshylyq úshin ustalǵandardyń materıaldaryn shuǵyl túrde qarap qana qoımaı, ákimshilik quqyqbuzýshylyqqa kinálilerge qatysty qaraýdy, ıaǵnı qamaýǵa alýdyń ornyna balamaly jazalaý sharalaryn qoldaný máselesin jedeldetýi kerek», - dedi J. Turmaǵambetova.