Qaraly kúngi vıdeosynan keıin Petropavlda bloger qamaýǵa alyndy
PETROPAVL. KAZINFORM – Petropavlda bloger Irına Antonenkonyń jalpyulttyq aza tutý kúni áleýmettik jelide jarııalaǵan vıdeosy qoǵamnyń qyzý talqysyna tústi. Keıin onyń 10 táýlikke qamalǵany belgili boldy.
Áleýmettik jelilerde taraǵan vıdeoda Irına Antonenko qaıtys bolǵan áskerı qyzmetshilerdi jeke tanymaıtynyn, týystyq jaqyndyǵy bolmaǵandyqtan aza tutýǵa mindetti emes ekenin jáne óziniń kúndelikti ómirin jalǵastyra beretinin aıtqan.
@pravda_h2026 Irına Antonenko #v ♬ orıgınalnyı zvýk - Vintazhny Trash
Jazba kóp uzamaı óshirilgenimen, onyń kóshirmeleri TikTok jáne Instagram jelilerinde tarady. Kópshilik blogerdiń bul áreketine narazylyq bildirdi. Jeli qoldanýshylary onyń sózin qaza tapqan áskerı qyzmetshilerdiń otbasylaryna qurmetsizdik retinde qabyldap, quqyq qorǵaý organdarynan oqıǵaǵa quqyqtyq baǵa berýdi surady.
Polıtsııa qyzmetkerleri blogerdiń jeke basyn anyqtap, 42 jastaǵy Petropavl turǵynymen profılaktıkalyq áńgime júrgizip, eskertý jasaǵan. Keıin Antonenko áleýmettik jelide keshirim surap, bolǵan jaǵdaıǵa baılanysty ókinish bildirdi. Alaıda qoǵamda rezonans týdyrǵan onyń áreketine qatysty pikirtalas jalǵasty.
Búgin Irına Antonenko 10 táýlikke qamaldy. Bul týraly Soltústik Qazaqstan oblysy polıtsııa departamentiniń baspasóz qyzmeti málimdedi.
- Polıtsııa 25 qyrkúıekte, jalpyulttyq aza tutý kúni áleýmettik jelilerdegi tikeleı efır barysynda áreketterine quqyqtyq baǵa berilgen Petropavldyń 42 jastaǵy turǵyny Irına Antonenkony anyqtady. Osy fakti boıynsha polıtsııa tekserý júrgizip, materıaldar jınaqtap, sotqa joldady.
29 qyrkúıekte sot áıelge usaq buzaqylyq jasaǵany úshin 10 táýlik ákimshilik qamaý taǵaıyndady. Faktige zańda belgilengen tártippen quqyqtyq baǵa berildi. «Zań men tártip» qaǵıdaty barshaǵa ortaq, - delingen vedomstvo habarlamasynda.
Buǵan deıin TikTok-taǵy balaǵat sóz aıtqany úshin Shymkentte tórt bloger qamaýǵa alynǵanyn jazǵan edik.
