Qaraqurtqa baılanysty Toraıǵyr kóliniń soltústiginde shatyr qurýǵa ruqsat berilmeıdi
PAVLODAR. KAZINFORM — Baıanaýyl ulttyq parkinde qaraqurttyń shyǵýy bıyl da tirkelip otyr. Park qyzmetkerleri olardy joıý jumystaryn júrgizip jatyr.
Jýyqta Baıanaýyl ulttyq parki ǵylym jáne monıtorıng bólimi men Jasybaı bólimshesiniń memlekettik ınspektorlary birlese otyryp, 6-shy oramdaǵy Toraıǵyr kóliniń tasty jaǵajaıynda qaraqurttardy kózin joıý is-sharalaryn júrgizgen.
— Іs-shara barysynda 93 qaraqurt tabylyp, joıyldy. Onyń ishinde 26-sy atalyq, ózgesi analyq. Qaraqurttar ázirshe jumyrtqa salmaǵany baıqalady. Al taralý aýmaǵy keńeımegen. Buryn qaýipti jándikter anyqtalǵan 30 gektar jerdi ǵana mekendeıtini tirkeldi. Qazir aýdanda jańbyr jaýyp tur. Kún ysyǵan soń ózge de aýmaqtardy, sonyń ishinde «Sáken jarynyń» mańaıyndaǵy tasty jerlerin súzip shyǵamyz, — deıdi ulttyq parktiń ǵylymı qyzmetkeri Murat Jasulan.
Park ókilderi Toraıǵyr kóliniń soltústik jaǵalaýyndaǵy tasty jerlerge týrıstik shatyr qurýǵa bolmaıtynyn eskertip otyr. Jándikterdiń taralýyna jol bermeý maqsatynda turǵyndar men demalýshylar arasynda túsindirý jumystary júrgizilýde.
Qaraqurt — ýly órmekshi tárizdiler tuqymdasyna jatady. Kózderi kúndiz-túni birdeı kóredi. Urǵashy qaraqurt uıasyn jerge salyp, aınalasyna tor toqyp, jándiktermen qorektenedi.
Eske sala keteıik, Baıanaýylda bıyl taǵy qaraqurt shyǵyp jatqany týraly buǵan deıin de jazǵanbyz.