Qaraqurt shaqqan atyraýlyq azamatqa kórshi el aýrýhanasynda kómek kórsetildi
ATYRAÝ. KAZINFORM – Atyraý oblysynyń Reseımen shekaradaǵy Qurmanǵazy aýdanynyń turǵynyn qaraqurt shaqqan. Balqudyq aýylyndaǵy áriptesteriniń shaqyrtýymen kelgen Astrahan oblysynyń dárigerleri qaraqurt shaqqan turǵynǵa medıtsınalyq kómek kórsetti.
Astrahan oblystyq densaýlyq saqtaý mınıstrliginiń aqparatyna qaraǵanda, Qurmanǵazy aýdanynyń Balqudyq aýylynyń dárigerleri kórshiles eldegi áriptesterinen kómek suraǵan.
«29 maýsymda Qazaqstan Respýblıkasy Atyraý oblysy Balqudyq aýrýhanasynyń dárigerleri Harabaly aýdandyq aýrýhanasyna habarlasty. Ondaǵy emdeý mekemesine 1970 jyly týǵan jergilikti turǵyn jándiktiń shaǵýynan toksıkalyq ýlanýmen túsken. Jergilikti turǵyndy qaraqurt shaqqany jóninde boljam jasalǵan. Er adamǵa shuǵyl mamandandyrylǵan medıtsınalyq kómek qajet boldy. Mundaı kómek kórsete alatyn Balqudyq aýylyna eń jaqyn medıtsınalyq mekeme – Harabaly aýdandyq aýrýhanasy. Balqudyq aýylyna reanımatsııa brıgadasy attandy. Zardap shegýshi aýdandyq aýrýhananyń jansaqtaý bólimine jetkizildi», - dep habarlady Astrahan oblysynyń densaýlyq saqtaý mınıstrligi.
Harabaly aýdandyq aýrýhanasynyń dárigerleri naýqasqa qajetti emniń bárin júrgizgen. Eki kúnnen keıin atyraýlyq naýqas jansaqtaý bóliminen palataǵa aýystyrylǵan. Qazir onyń ómirine tónip turǵan qaýip joq.
Eske sala ketelik, buǵan deıin Atyraýda Reseı azamattyǵyn alǵanyn habarlamaǵan áıelge 516 myń teńge aıyppul salynǵanyn jazǵan edik.
