Qaraqum halqy muz eritip iship otyr - Almaty oblysy
TALDYQORǴAN.QazAqparat - Almaty oblysyndaǵy Qaraqum aýyly halqynyń aýyz sýdyń beınetin kórgenine jarty ǵasyrdan asqan. Turǵyndar jazda tirshilik nárin 60 shaqyrym jerden tasymaldaıdy. Al qysta el-jurt kólge qatqan muzdy eritip ishedi, dep habarlaıdy QazAqparat tilshisi.
Qaraqum aýylyna ortalyqtandyrylǵan sý júıesi tartylýda. Biraq bir jylda aıaqtalýy tıis jumystar ekinshi jylǵa sozyldy. Sebebi jobalaý barysynda jol qashyqtyǵy eseptelmegen. Al merdiger bul jerge qurylys materıaldaryn kóldi aınalyp 3 oblys arqyly tasyp shyǵyndalǵan. Qazirgi tańda túzetýler engizilip, jetpeı qalǵan qarjy qarastyrylýda.
«2017 jyly 78 mln bólinip tolyǵymen ıgerildi. Qalǵan ıgerilmegen 25 mln teńgege aldaǵy oblystyq sessııasyna usynys eńgizildi. Qoldaý tapqan jaǵdaıda jumystar tolyǵymen aıaqtalatyn bolady», dedi oblystyq Turǵyn úı kommýnaldyq sharýashylyǵy basqarmasynyń bólim basshysy Azamat Beıisbaev.
Al Qaraqum aýyly Balqash kóliniń batys jaǵalaýynda, Qaraǵandy oblysynyń aýmaǵynda ornalasqan. Mundaǵy 60 gektar jer Almaty oblysynyń Qaratal aýdanyna tıesili. Bul eldi-mekende 100-ge jýyq tútin, 500-den astam halyq bar.
«Biz sýdy tasyp ishemiz. Jol arasy 60 shaqyrym. Qysta muz qatqanda joldy qysqartý úshin Balqash kóliniń ústimen júremiz. Ol jermen júrsek 13 shaqyrym. Jazda sýdy tasymaldasaq, qysta Balqash kóline qatqan muzdy eritip ishemiz. Tazasyn alyp, úıge aparyp eritemiz. Dámi taza, jaqsy. Sodan beri mine 60 jyl ótipti», - deıdi Qaraqum aýylynyń turǵyny Joljaqsy Kákenov.
