Qaraqshylyq shabýyl jasaý úshin arnaıy saparǵa shyqqan azamattar ustaldy
ASTANA. Qarashanyń 2-si. QazAqparat /Aıdar Ospanalıev/ - Aqmola oblysynda elimizdi aralap, qarýdyń kómegimen áshekeılik buıymdar satatyn dúkender men lombardtarǵa qaraqshylyq shabýyl uıymdastyryp júrgen qylmyskerler qolǵa tústi.
Bul oqıǵa jóninde búgin jýrnalıstermen bolǵan brıfıngte Іshki ister mınıstrliginiń Til saıasaty jáne aqparat departamentiniń bastyǵy Qýanyshbek Jumanov málim etti, dep habarlaıdy QazAqparat.
Onyń aıtýynsha, qaraqshylar elordanyń 1981 jáne 1983 jyly týylǵan azamattary bolyp shyqty. Qazirgi tańda olarǵa qatysty Aqmola men Qostanaı oblystarynyń aımaǵynda jasalǵan 4 qarýly shabýyl boıynsha is qozǵalyp otyr. Sondaı-aq olardyń respýblıkanyń ózge de aımaqtaryndaǵy qylmystarǵa qatystylyǵy anyqtalýda. «Al Ońtústik Qazaqstan oblysynyń Maqtaaral aýdanynda turǵyndarǵa qaraqshylyq shabýyl jasap, 6 mıllıon teńge men 1 mıllıon teńgeniń áshekeılik buıymdaryn qoldy qylǵan qylmystyq top quryqtaldy. Olardyń áreketterinen zardap shekkender kóbine kepildikke áshekeılik buıymdardy alyp, paıyzdyq ústememen qaryz aqsha berýmen aınalysyp júrgen azamattar bolyp otyr.
