Qaraqshylyq ónimdermen kúreste aqparattyq nasıhat myqty bolýy kerek
ALMATY. Tamyzdyń 17-si. QazAqparat /Erbol Azanbek/ - Búgin Almatyda álemdik keńse tehnıkalaryn shyǵarýshy Hewlett Packard (NR) kompanııasynyń ókilderi qaraqshylyq ónimnen saqtaný joldaryna arnalǵan keńes ótkizdi.
NR-diń qaýipsizdik jónindegi aımaqtyq menedjeri, Eýropa, Afrıka jáne Taıaý Shyǵys boıynsha qaraqshylyq ónimge qarsy zertteý tobynyń jetekshisi Lýkas Drlıktiń aıtýynsha, zańsyz ónimdermen kúreste jergilikti bılik, óndirýshi kompanııa jáne tutynýshylardyń birlesken is-qımyldary jaqsy nátıje beredi. «Zańsyz ónim ádette belgili brendterdiń kóshirmeleri bolyp tabylatyndyqtan, qaraqshylarǵa úlken tabys ákeledi. Tutynýshylar kóp jaǵdaıda taýardyń túpnusqasy dep, qaraqshylyq ónimderdi alyp jatady. Nátıjesinde ónim oıdaǵydaı bolmaı brendke de, alýshyǵa da zııan keledi. Bul - aqparattyń azdyǵynan. Sondyqtan jergilikti bılik pen quqyq qorǵaý organdarymen birlesip jumys isteýge biz daıynbyz» deıdi NR-diń aımaqtyq menedjeri. Onyń aıtýynsha, Qazaqstan zańsyz ónimderdiń týra jolynda otyr. Osynyń saldarynan Qazaqstan Ońtústik-Shyǵys Azııada, naqtyraq aıtqanda Qytaıda óndirilgen zańsyz ónimderdiń negizgi tutynýshysy ári Shyǵys Eýropaǵa ótkizýshi tranzıttik jol bolyp tabylady. Lýkas Drlıktiń aıtýynsha, bul rette aqparattyq nasıhat kúshti bolýy qajet. «Biz bul baǵytta álemdik baǵdarlama daıyndadyq. Aldaǵy ýaqytta bul baǵdarlama Qazaqstanǵa da jetedi», dedi belgili brendtiń ókili.
