Qaraqshylarǵa qarsy uıymdastyrylǵan operatsııa sátti ótti - aptalyq brıfıng
ASTANA. Qarashanyń 2-si. QazAqparat /Aıdar Ospanalıev/ - Qazannyń 29-y men 31-i aralyǵynda respýblıkada qaraqshylyq shabýyldarmen baılanysty jaǵdaıdy retteýge baǵyttalǵan «Qaraqshylyq» keń aýqymdy operatsııasy uıymdastyryldy. Onyń barysynda 15 qaraqshylyq shabýyl tirkelip, onyń 13-iniń izi sýymaı ashyldy.
Operatsııanyń atqarylý barysy jóninde búgin jýrnalıstermen bolǵan brıfıngte Іshki ister mınıstrliginiń Til saıasaty jáne aqparat departamentiniń bastyǵy Qýanyshbek Jumanov tanystyrdy, dep habarlaıdy QazAqparat.
Onyń málimetterine qaraǵanda, operatsııa aıasynda qoldanylǵan sharalar buryn jasalǵan 27 qaraqshylyq áreket pen 107 tonaý oqıǵalarynyń betin ashýǵa múmkindik berdi. Almaty qalasynda valıýta aıyrbastaý oryndaryn 5 ret tonap, 2 ret qaraqshylyq shabýyl jasaǵan Ońtústik Qazaqstan oblysynyń 18 ben 24 jas aralyǵyndaǵy
7 azamaty qolǵa tústi. Olardan betperdeler men urlanǵan aqshanyń biraz bóligi tabyldy. Sondaı-aq qaraqshylyq shabýyl jasaǵany úshin 48 azamat qolǵa túsip, olardyń 43-i qamaýǵa alynǵan. Al tonaý áreketterimen aınalysqany úshin kúdikti 210 azamattyń 55-ine kisen salyndy. Operatsııa aıasynda qaraqshylyqpen aınalysyp júrgen 31 adamnan turatyn 11 qylmystyq toptyń joly kesildi. Sondaı-aq kisi tonap júrgen 70 adamnan turatyn 25 qylmystyq top ókilderi qamaýǵa alyndy.
