Qaraqshylar «úshtigi» Shymkentte júk kóligine shabýyldady
ASTANA. 23 mamyr. QazAqparat - OQO ІІD-niń krımınaldyq polıtsııa qyzmetkerleri qaraqshylyq shabýylmen aınalysyp júrgen qylmystyq topty quryqtady.
Bul týraly búgin ІІM-de ótken brıfıng barysynda vedomstvo baspasóz qyzmetiniń basshysy Nurdildá Oraz málim etti.
Jedel-izdestirý is-sharalary barysynda Shymkent qalasynyń 26-30 jas aralyǵyndaǵy jumyssyz úsh turǵyny ustaldy. Olardyń bireýi urlyq jáne kólikti aıdap áketý qylmysy úshin buryn sottalǵan. Qylmystyq toptyń oblys aýmaǵynda jasalǵan 3 qaraqshylyq shabýylǵa qatysy bar ekendigi anyqtaldy.
«4 qańtarda tańǵy saǵat 4-te qylmyskerler «Almaty-Termez» avtojolyndaǵy «Mashat» asýynda «Skanııa» júk kóliginiń júrgizýshisine qarsy qaraqshylyq shabýyl jasady. Jábirlenýshige tıesili 30 myń teńge jáne onyń jeke múlkin qoldy qylǵan. Birneshe kúnnen keıin qylmyskerler Shymkent qalasynyń áıel turǵynyna shabýyl jasap, páterinen 600 myń teńge jymqyrdy. Sondaı-aq, naýryzdyń sońynda qylmystyq top Túlkibas aýdanyndaǵy Eltaı aýylynyń turǵynyna qatysty qarýdy qoldana otyryp, qaraqshylyq jasap, onyń jeke múlkin ıelendi», - dep naqtylady resmı ókil.
