Qaraqshylar Shymkent-Samara tas jolynda júk kóligin tonap ketti
ShYMKENT. QazAqparat - Shymkent-Samara tas jolynyń boıynda júk kóligi júrgizýshilerin qarýmen qorqytyp, tonap ketken. Betterine betperde kıgender qylmystyq áreketterin Eski Iqan aýylynyń tusynda jasaǵan, dep habarlaıdy QazAqparat HAA tilshisi.
Túrkistan qalasy prokýrory Rýslan Ábdiraımovtyń bergen málimetinshe, qylmystyq top «BMV» markaly avtokóligimen tas jolda ketip bara jatqan «Man» markaly júk kóligin, jol jıegine qysyp toqtatqan. Sóıtip, tapansha men sholaq myltyq, balǵamen júk kóligindegilerdi uryp-soǵypty. Qoldaryn baılap, egistik jerge alyp barǵan. Qaltalaryndaǵy 30 myń teńgesi men 185 myń teńgesin, birneshe uıaly telefondaryn qoldy etipti. Sondaı-aq kóliktegi 5-6 tonna shamasyndaǵy mys metaldaryn tonaǵan. Artynsha oqıǵa ornynan boı tasalaǵan.
Bul derek boıynsha Túrkistan qalalyq ІІB-na habarlama túsip, tártip saqshylary oqıǵa ornyna jetedi. Oqıǵaǵa baılanysty Qylmystyq kodekstiń 192-baby 2 bóliginiń 1-tarmaǵymen ( «Adamdar tobynyń aldyn ala sóz baılasýymen qaraqshylyq jasaý») is qozǵalyp, tergep-tekserý jumystaryn júrgizdi. Jedel-izdestirý sharalarynyń nátıjesinde 20-25 jas aralyǵyndaǵy 6 kúdikti ustaldy. Olar ýaqytsha tergeý abaqtysyna qamalyp, is boıynsha protsestik prokýror taǵaıyndalǵan.
Tergeý amaldary júrgizilýde. Qolǵa túskenderdiń osy tektes ózge de qylmystarǵa qatysy barlyǵy anyqtalyp jatyr.
